Friday, March 23, 2007

مفيش مساواه

راجل وبنت واقفين على باب الأسانسير الباب يتفتح تلاقى الراجل رجع لورا خطوتين وقالها اتفضلى.......حلو فى المواصلات الدنيا زحمة ومفيش مكان والبنت ركبت وهى عارفة انها هاتوقف تلاقى ياعينى الراجل قام وفضل واقف طول السكة عشان الهانم تقعد مش باقول إن الرجاله كلهم دلوأتى بيعملو كده وفى كتير مش بيقفوا غير للبنت الى بتعجبهم ما علينا..... مش ده القضيه القضيه ان لسه البنات بتطالب بالمساواه وحقوق المرأه "ويوم المرأه المصريه ده كمان".لو كانوا أصلا مؤمنين بالمساواه مكانوش وافقوا ان الراجل يدفعلهم حسابهم فى المطاعم والكافيهات أو يقفلهم فى المواصلات أو حتى يدخلهم قبله ladies first فى اليابان أكثر حاجه تدايق البنت ان الولد يتبع معاها نظام
ساعتها هاتعتبرها اهانة ويبقى يومه بمبى بكل صرامة هاتقوله ان فى مساواه وذايها ذايه يعنى على باب الأساسير الى واقف الأول هايدخل ولو مفيش غير مكان واحد هايتدافعوا عليه وساعتها برده مش هايبقه الولد قليل الذوق ومش
gentel
بالعكس عادى جداَ ذى ما هى مستعجله وتعبانه هو كمان تعبان ومستعجل ولو هى مش حمل البهدله خليها قاعده فى بيتها ايه الى نزلها؟؟؟
لو البنت المصريه تقدر تعمل كده تبقى تطالب بالمساواه مش عايزه بس تبقى رئيسة فى العمل والمرتب والحاجات الكويسه وتيجى فى الجد وتقول هوه الراجل أنا مش من اليابان أنا مصريه وأبويا مصرى وسمارى ولونى مصرى ومنكرش ان رغم رفضى للفكره ده بأبقه مبسوطه لمَّا حد يعملها معايا لان الراجل والبنت من الحاجات الى مينفعش تتقارن أو تتساوى ذى ما هوه ماينفعش أقارن بين الحبر والقلم كل واحد ليه دور ومحدش يقدر يشتغل من غير التانى كل واحد منهم لوحده كائن ناقص ووجودهم مع بعض بس هوه الى بيعمل التكامل

19 comments:

The Manager said...

الحمد لله والصلاة والسلام على سيدنا رسول الله وآله وصحبه ومن وآلاه ..

موضوعك جميل قوى , والأجمل انه ييجى من بنت مش من واحد راجل :)
ومش مهم رأيي ولا رأى غيرى مع الأحترام للجميع لكن الإسلام فعلا بيميز المرأة وعايز يريحها وبيراعى كويس طبيعتها , ودة واضح من قصة سيدنا موسى مع بنات سيدنا شعيب عليهم السلام عندما سقى لهم وغير ذلك , فاالإسلام طبيعى بيدى للرجل دور جينتل فى معاملته مع المرأة
اما قضية المساواة بقة فطبعا انا لما بسمع السيدات إللى بيطالبوا بكدة بتوع الجمعيات والكلام دة بصراحة فى حاجات كتير بتكون مش واقعية ومش مناسبة فعلا
بس برضه مش فارقة معايا ... لو هى شاطرة تاخد إللى تقدر تاخده ولو هى اشطر تشوف دينها بيقول إيه وتمشى عليه وخلاص

اخوكى فى الله

الراقص مع الذئاب said...

شههد شاهد من اهلها

فينهم يجوا يسمعوا
اللي يحرق الدم مطالبة المراة بالمساواة مع الرجل في الحجات اللي بتيجي علي مزجها...اما بقي في الحجات اللي مش علي مزجها تبدأ تعيط وتتشال وتتهبد وتتهم الرجالة انهم وحوش ادامية معندهمش رحمة....لازم يتعلموا الاتكيت...ازاي تقعد والانسة الرقيقة واقفة...ازاي تركب قبلها

طيب لو انتم حلوين كدا وبتطالبوا بالمساواة....ادخلوا الجيش
ايوة ...ادخلوا الجيش زي ما احنا بندخل كدا واحلقوا شعركم واقفوا في الشمس واضربوا نار وازحفوا في الصحراء
احنا بيعملوا فينا كدا.....
والله انا بفكر اعمل جمعية ونطالب احنا كمان يا رجالة بالمسواة معاكم

معلش طولت عليكي

موضوع جميل ونظرة منطقية وحيادية تامة
احييكي عليها

وجع دماغ said...

المساواة بين الرجل والمرأة مشكلة جدلية
أعتقد أن المساواة تحدث مع أختلاف طبيعة الحقوق والواجبات التى على الطرفين الألتزام به
أما المساواة المطلقة التى تقلب من الملرأة رجل والرجل مرأة فهى ضد الطبيعة البشرية

واحدة من الناس said...

the maneger
جزاك الله خيرا فعلن الإسلام أعظم دستور للعداله
ولو كنا ماشين عليه مكانش هايبقه فيه مشكله
****************
حضرت الراقص
الى عايز البنات تحلق وتضرب نار قلب صفحات التاريخ ابتداً بالفرعونى مرورا بالإسلامى وصولاً للحديث هتلاقى أدوار نسائيه مقدرش عليها الرجال تقدروا انتوا بأه تتحملوا صرخه واحدة من صرخات الأم وهم بينزعوا روح من جواها
رجعنا تانى لفكره التكامل:)

الراقص مع الذئاب said...

اولا احب ان تنطقي اسمي كاملا...الراقص مع الذئاب...فمناداتي بالراقص لا احبه...انا لست راقص ...ان كان صعب عليك فهم مغزي اسمي فمعناه هو العابث مع الذئاب...والاسم مقتبس من فيلم اجنبي شهير لكيفن كستنر....علي الرغم من اني مش بحب الافلام...بس الاسم عجبني

المهم بقي هو موضوعنا بتاع المسواة
ايه بقي الل غير رأيك دلوقتي؟؟؟

مفيش مساواة...كل ميسر لما خلق الله
ايوة المرأة ربنا اختصها بالحمل والوضع والالم اللي يعتبر من الالام التي لا يتحملها البشر....وعندها قوة صبر واحتمال لا يطيقها الرجل....يبقي احنا بقي عاوزينها تستريح وتقعد في بيتها معززة مكرمة وهنشتغل خدمين تحت رجلين حضرتها

دا اللي خصها بيه الاسلام....ممكن فعلا تساعد زوجها في اشياء كتير
بس حتة بقي تحشر نفسها في اللي ملهاش فيها دي الل بتعكنن عل الواحد

والله لو الناس عرفت الكرم دا وكل واحد عرف الواجب اللي عليه الكل هيرتاح

جزاكي الله خيرا اختي الكريمة

.............

Fo2sh said...

كلام كان نفسي اقوله من زمان
http://engafm.blogspot.com/

mohandat said...

السلام عليكم ورحمة الله
انا طبعا اول مره اشوف مدونتك واللي بعتهالي في تعليق الاخ الراقص مع الذئاب ( انا كنت بقولها الراقص بس برضو )
هو قراء موضوع ليا ضمن موضوعاتي حوار مع امرأة ودا اللينك بتاع الحوار http://a-researcher-from-the-truth.blogspot.com/2007/03/blog-post_28.html
طبعا انا مع المرأة بس تعرف واجبتها الاول وموضوعي ده للمرأة اللي طوال اليوم بتنحر في صوتها في الجمعيات والحاجات ديه دول اللي عايز يحصلهم كده
-------
اشكرك لموضوعك المتميز وانا ملاحظ ان مفيش بنت علقت عليه مش عارف ليه
الباحث عن الحقيقة
مهند المصري

واحدة من الناس said...

الراقص مع الذئاب
أنا فعلن مكانش قصدى حاجه عن الاسم قولته كدة مجازا
ثانيا أنا مغيرتش رايي انا ضد ان البنت تعقد فى البيت أنا عايزاها تشتغل ويبقى ليها كيان (مش أى شغل
شغل يناسب طبيعتها طبعاعايزاها تبقى مثقفه وعندها خبره وتتفاعل مع المجتمع عشان تعرف تربى أولادها صح مع العلم ان يكون أولادها وبيتها هم محور حياتها الأساسى
****************
مهند
شكرا على زيارتك لصفحتى بس أنا فعلن مش عارفه ليه البنات قطعتنى :)))

بيقولوا سايكو said...

ادينى أنا اهه يا مشمش بارد عليكى و باقولك ان كلامك نصه بس اللى صح .. يعنى لو البنت ما دخلتش قبل الراجل فى الأسانسير .. بس بتبقى مشكلة انا جربتها كتير جدا انى اركب اوتوبيس و اكون واقفة و خصوصا لو زحمة ... ما لو الرجالة مؤدبين ماحدش كان هيقول قعدوا البنات .. غير كده الرجالة ( و أنا لما باقول الرجالة باقصد معظمهم لان لسة فيه قلة قليلة ) بقوا ياخدوا المسألة عند و ما يقوموش لأى حد حتى لو كانوا قد مامتهم .. مادامت واحدة يبقى تستحمل و تقف بغض النظر عن سنها أو عن هى ممكن تكون تعبانة و لا لأ .. بياخدوا بمبدأ مش قلتوا هتشتغلوا يبقوا اشربوا بقى .. و بيكونوا قاصدين المضايقة لمجرد المضايقة و انه لو كان راجل اللى قدامهم ماكانوش عملوا كده ... غير كده لما بيتقال مساواة بيكون مطلوب مساواة فى الاحترم فى المعاملة فى النظرة .. و كمان غير كده و كده جربوا لو الستات قعدت فى البيت ما اشتغلتش هيبقى إيه حال الدنيا .. كان فى فيلم زمان بيحكى عن المشكلة دى و ان الناس ما قدرتش تعيش ... أساسا عمل المرأة بقى أساس بيقوم عليه معظم البيوت ، و للناس اللى بتقول إن فى عربيات سيدات فى المترو و خلافه و ده لإن الست لو فى مواصلة مشتركة مش بتعرف تاخد حقها و ده عن تجارب مربرة فى ركوب الميكروباصا وقت الزحمة .. انا باتزق و بيتداس على رجلى و بتحصل فى البدع .. بيبقى كذا سواق ميكروباص سايب الكرسيين الىل جنبه ما بيركبش فيه غير بنات .. مرة السواق ركبنا انا و صاحبتى رغم انه كان رافض يركب راجل فيه .. فواحد من اللى قاعدين ورا اتريق على السواق و قاله ( إلا قولى هو اللى بيعد قدام بيدفع أكتر و لا ده للحريم بس .. أنا شايفك مشغل قرآن ) فالسواق قاله ده للحريم بس .. بصيت ورا لقيت الميكروباص كله رجالة و مفيش أى بنت غيرى و صاحبتى ... يبقى انهى مساواة دى اللى بتطالبوا بيها يا ولاد لما بتكون المواصلات مشتركة بتكون النسبة 12 راجل لبنتين .. مفيش غير كام مرة بس اللى بيبقى فى واحد محترم و بيخلى البنت هى اللى تركب لانه بيبقى عارف البهدلة بتبقى عاملة ازاى .. و كده كده تحمل الرجالة بيكون زيادة عن تحمل البنات ، و عامة شرط أساسى فى الى هاتجوزه إن شاء الله انه لو فى أوتوبيس أو خلافه ما يكونش قاعد لو فى أى بنت واقفة ، و بمناسبة جمعيات المرأة و الهبل ده فأنا أصلا مش باقتنع بيهم لانهم مجرد كلام فى الهوا

معلش طولت بس لان الموضوع ده بيستفزنى

mohandat said...

السلام عليكم ورحمة الله وبركاته

اسمحيلي يا شيماء اني اعلق علي تعليق اتكتب
جمله بس في التعليق هي اللي شدتني بالرغم من انو مطوله مش تعليق الجمله بتقول (تحمل الرجالة بيكون زيادة عن تحمل البنات )
يعني في فرق ؟
ولا مفيش فرق؟
في مساواه ؟
ولا مفيش مساواه ؟
في فروق فرديه ؟
ولا مفيش فروق فرديه ؟
انا شخصيا ويعلم ربنا بقف للستات اللي بحس انهم فعلا محتاجين انهم يقعدو
بس لو زميله ليا في الشغل هي اللي واقفه مش هقفلها
يمكن اكون غلطان ويمكن اكون صح
بس تحمل كل شئ يبقي بمميزاته وعيوبه
يعني عايزه مساوة استحملي
ودا مش تحامل عليكي
دا الصح
يعني مجيش اخد من النحل العسل واقولو لا ارجوك متقرصنيش
بمعني اخر لك ما ليا وعليكي ما عليا
مع احترامي للجميع
دا قانون الحريات اللي بتفرضو علينا تبعيتنا للغرب
ويا رب نرجع لعادتنا وتقاليدنا في يوم من الايام

الوافي said...

السلام عليكم

اشكرك يا شيماء على الكلام العاقل الموزون .... وفعلاً المساوة مطلب غير واقعي وغير منصف في حق المراءة

اعتقد لو كان فيه لزوم لعمل جمعيات فأنا اقترح بعمل جمعيات للمطالبة بالعدالة للمراءة من الرجال اللذين يظلمونها في البيت او في الشغل او في الشارع

انا اعتقد ان مكانة المراءة الحقيقية اعلى من الرجل ومطالبتها بالمساواة اعتبره جهل بحقوقها فالاجدر ان تطالب بحقوقها التي تجعل منها ملكة في البيت والشارع
لنتذكر فقط ان المراءة مسؤلة من ابيها او من اخيها او من زوجها حثى لو كانت امراءة عاملة ... يعني الرجل هو اللي مفروض عليه انه يوفرلها كل مصاريفها حثى لو كانو بيشتغلوا مع بعض وبيقبضو نفس المرتب

فالمساواة هنا لصالح من؟

khaled said...

مفيش حاجه اسمها مسواه بين رجل وامرأه
بس ميمنعش ان حريه المرأه الى لازم تخدها
مسروقه,ولازم ترجعها بس للاسف الاسلاميين بكل طوائفهم سابو الموضوع ده لبتوع حريه المرأه والتحرر وموش عارف ايه كده
بس يلا يعنى هوا الراجل واخد حريته اوى عشان الست تخدها

mohandat said...

السلام عليكم
ايه الغيبه دي كلها
مفيش مواضيع جديده
وحاسس انك بطلتي تدخلي المدونه اساسا
يا رب يكون المانع خيرا
اخوكي
مهند المصري

واحدة من الناس said...

آيات
ياعينى دا انتى شاكلك شايله ومعبيه :))
معاكى ان فى ولاد كتير مش بتحترم حد ولا حتى نفسها بس مش معنى انه موقفليش يبقى مش بيحترمنى جايز أوى يكون تعبان أكتر منى وبعدين ايه مش هاتجوز غير واحد بيوقف دة هاتقلقينى عليكى ليه
:)))على العموم مرسى أوى انتى البنت الوحيده الى عبرتنى
******************
مهند
برافو عليك هوه ده بالظبط الى كنت عايزه أوصله الغرب طالما قالوا فى مساواه تبقى فى كل حاجه مش احنا بنقول عندنا مسواه ذيهم وبنقى عملنا ذى الغراب الى عايز يبقى طاووس لا عرف
يبقى طاووس ونسى هوه كان غراب ازاى
مرسى على سؤالك الدراسه بس شدت شويه
*******************
الوافى
كلام جميل كلام معقول مقدرش أقول حاجه عنه بتعرفوا تضحكوا علينا بالكلمتين دول:))))
*******************
خالد
جبتك ياعبد المعين :))))
حريه ايه الى مسلوبه ماحنا الحمد لله ذى الفل اهوه بنتعلم وبنشتغل وبنسافر وبنعمل الى عايزينه

copa said...
This comment has been removed by a blog administrator.
Black Pearl said...

والله أجدع كلام قريته من واحدة بنت
عمر البنت ما تكون زي الراجل
و كل الكلام عن المساواة ده هفلطة ملهاش أي لزمة..و مش هيجيلنا من وراها غير تعب القلب

و قال إيه المفتي بيقول ان الست يجوز انها تكون قاضية و رئيسة جمهورية كمان..آه والله

تقريبا هو معتقد ان الرجاله انقرضت في مصر او ..الله أعلم بقى

على العموم هسيب رأي المفتي ده للشباب يردوا عليه

حنان شلبي said...

اهلين وسهلين بهالعينين والله انك اجيتي وجبتيها من قصيرها وكويس انك انثى زيي هيك بكون ضمنت انو انا تفكيري صح واني وحدة من الي بطالبو المطالبات بالمساواة من النساء انهم يخفو علينا شوي وبحكيلهم يناس يا هو احنا اهو و احنا بنطالبكم بالتوضيح وقت مطالبتكم بالمساواة وبنقلكم بليييييييييييز احكو عن حالكم وبس لانو احنا الحمدلله نلنا المساواة من زمااااااااان خالص والي بدو شوي بنعطيه

فمو بحاجة للمزيد الي عنا بكفينا وبزيد
مع تحياتي

el3araby said...

وشهد شاهد من اهلها
زي ما قال الاستاذ الراقص مع الذئاب..
وزي ما قال الاخ المدير الموضوع جميل والاجمل انه ييجي من بنت مش من راجل
ورايي الخاص ان الستات بتوع حقوق المراه دول مش وراهم حاجه يعملوها ..سوري يعني انا مش شايف منصب مخدتوش الست فمصر وانا متوقع انه ممكن فيوم من الايام يحكم مصر ست .بس ده فنفس الوقت اللي هيحكم فيه امريكا راجل اسمر البشره ..شوفي انتي ده بقي يحصل امتي

Anonymous said...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘