Thursday, June 21, 2007

صندوق هديه

قصه جاتلى على الميل معرفش ايه أصلها كانت بتقول
ان فى بنت قالت لمامتها أنا السنه ده هاجبلك هديه فى الكريسماس وكل شويه كانت بتقولها ده هديه حلوه أوى؛انتى بتحبيها؛انتى محتجالها وكلام كتير خلى مامتها تشتاق للهديه ده أكتر من أى حاجه تانيه وفى يوم الكريسماس البنت حاطيت صندوق الهديه تحت شجره الكريسماس جريت الأم عليها أول حاجه وشالت ورق الهدايا وفتحت الصندوق وصدمتها انها لقته فاضى كشرت وزعلت وزعقت وضربتها
وقالتلها أنا ضربتك عشان أعلمك متعشميش حد بحاجه وانتى مش هاتعمليهاله البنت قاعدت تعيط وتقولها الهديه مش فاضيه بصلها كويس ياماما الأم مفهمتش حاجه فالبنت فى وسط دموعها وألمها
قالتلها أنا مليته من حبى وقبلاتى حطيت فيه 2 مليون بوسه انتى ازاى مش شايفاهم ياماما نزلت الأم على ركبتها وقاعدت تعتذرلها على الأذيه ده وقالتلها ده أجمل هديه جاتلى وتستحق أستناها العمر كله. البنت ده ماتت فى حادثه والأم مصبرهاش على فقدانها غير الصندوق الى مليان قبلات بنتها كل يوم كانت تفتحه وتاخد منه الى يصبرها على فقدنها
القصه انتهت

كام حد وهوه بيسلم عليك ضمك أوى ودقق فى عنيك عشان يحس بوجدك؟
كام حد بكى على مخدته لما لقاك فى يوم حزين؟
كام حد اتلكك وجاب حجه هبله عشان يكلمك ويسمع صوتك ؟
كام حد فرح بجد لنجاحك ودعالك من قلبه واتمنالك الخير من غير مقابل؟
كام حد حافظ تاريخ عيد ميلادك ونمره تليفونك أكتر من نفسه؟
كام حد عدى جنب محل ولقى شيكولاته انت بتحبها افتكرك وجبهالك؟
كام حد مسك المبايل بتاعه وحضنه لما لقى اسمك عليه؟
أكيد مش كتير

صعب انك تشوف الحاجات ده كلها صندوق فاضى والأصعب انك تقدمها والناس تشوفها فاضيه بس المميت والقاتل انك تقدمها وتتضرب بعديها أما انك تقدمها وتتضِّرب ويستخسر فيك حتى كلمة اعتذارفده الإحساس الى مش هاتوصفه كلمه. ياريت نبص فى الصندوق كويس قبل ما نجرح ونبّكى ونضرب مش عارفه احنا الى بنخسر الناس والا هما الى بيخسرونا بس الى أنا عارفاه ومتأكده منه ان الصندوق مش فاضى

47 comments:

الراقص مع الذئاب said...

السلام عليكم
مش عارف ليه موضوعك جه علي حاجة بهرب منها ومش عاوز اتكلم فيها
وانا بقرا نصه بالضبط رن التلفون وواحد من صاحبي بيسأل عليا عشان عرف اني نزلت اجازة
بيعتبني اني معرفتوش اني نزلت
مع اني اول اجازة نزلتها بعد غياب شهر ونص محدش كلف خطره انه يجي يسلم عليا
مش هنكر ان في ناس جتلي زيارة وكلفت نفسها تعب المشوار
ربنا يجازيهم خير
بس كانوا 3 من عشرات من الصحاب...مع ان المسافة مش بعيد
مش عارف هي الدنيا بتشغل الناس لدرجة إنهم يتجاهلوا مجرد السؤال عن بعضهم
وانتي بتعدي كام واحد وكام واحد وكام واحد حسيت اني غريب في بلدي وبين صحابي
بقي اللي فضلي منهم مجرد زكريات قديمة وقصص بفتركها مع نفسي وابتسم وانا في لحظة سرحان او تأمل
يا خسارة
الصندوق طلع فاضي....وطلع كمان مكسور

.:.-=- ELGaZaLy-=-.:. said...

كام حد وهوه بيسلم عليك ضمك أوى ودقق فى عنيك عشان يحس بوجدك؟
كام حد بكى على مخدته لما لقاك فى يوم حزين؟
كام حد اتلكك وجاب حجه هبله عشان يكلمك ويسمع صوتك ؟
كام حد فرح بجد لنجاحك ودعالك من قلبه واتمنالك الخير من غير مقابل؟
كام حد حافظ تاريخ عيد ميلادك ونمره تليفونك أكتر من نفسه؟
كام حد عدى جنب محل ولقى شيكولاته انت بتحبها افتكرك وجبهالك؟
كام حد مسك المبايل بتاعه وحضنه لما لقى اسمك عليه؟
أكيد مش كتير

-------------------------------

تعرفى يا شيماء سعات كتير بحسد نفسى على انى مش بحس بالوحدة كتير

بس تفتكرى الصندوق الوهمى دة مش

هتحتاج انها تملاه من جديد بحب تكتر

علشان الطفلة تبتسم لها من السماء

القصة مستنى ..بجد

أحمد سلامة said...

المشكله كمان الكبيرة
اننا نعمل كده مع حد
وهو مش حاسس
ازعل له او افرح له في نفس الوقت مشاعري دي بالنسباله مبتفرقش
أكيد هفضل اني مايكونش عندي الصندوق ده
بس الواحد غصب عنه بيوجده
-----------------------------------
موضوعك رقيق وجميل مع انه مش متماشي مع جو الامتحانات بقى
:)

gohayna said...

اسئلتك بتوجع اوي

وجعتيني جدا

عارفه
انا في غربتي هنا

بعدي عن اصحابي واهلي

فيه امور كتير بتوضح

اما يمكن الحمد لله ربنا رزقني باصحاب اخوات بجد بيسألوا عليا هنا وفي البيت

وبيطمنوا عليا من وقت للتاني
بس كله شويه تيجي فكره
اني بس بقالي هنا في الكويت شهر وشويه

يمكن لما يعدي كام شهر

مش هيفتكرونني

عشان الدنيا بتنسي صدقيني

المشكله اني والله عمري ما نسيت حد

ودايما بدقق في العنين عشان احسس الي قدامي باهميته

دايما معاهم بقلبي وبحزن لحزنهم وبفرح لفرحهم

عمري ما كنت جافه
مهما الدنيا قسيت عليا

كتير بيقولولي بكره الدنيا تعلمك

انك عبيطه
بس انا شايفه اني اكون عبيطه احسن مليون مره من اني اكون جاحده او قاسيه زي الزمن


موضوعك جاامد جدا جدا جدا

تسلم ايدك

The Manager said...

قصة فظيعة يا شيماء
بجد القصص دى بتحسس الواحد انه معندوش إحساس خالص :(

اما اسألتك فبجد بعضها حسسنى بواحد صاحبى جدا انا عارف انه بيحبنى طبعا لأنه انتيمى لكن حسيت بحبه ليا اكتر لأنه فعلا لازم كل فترة يبقى عايزنى اكلمه او يتصل بيا علشان يتكلم معايا ويطمن عليا

لكن طبعا مش هيحضن موبايله لما يلاقى اسمى عليه :D

دى بتاعة الجو مش بتاعة الأنتيم
وانا بصراحة معتقدش حد بيحضن موبايله لما بيشوف اسمى عليه أولا لأن معنديش جو
ثانيا على إيه أصلا ههههههههه

البوست دة خلانى احس انى لازم اقدر الناس إللى بحبهم اكتر لأنى فعلا احيانا بكون مقصر معاهم غصب عنى

وجزاكى الله عنى خيرا
وفتح الله عليكى فتوح العارفين به :)

FloNa said...

جامدة اوي فعلا وابكتني من جوة !!

حسيت وانتي بتسألي الاسئلة دي ان الناس دول ممكن يكتروا لو انا ابتديت معاهم بكدة !!


والله الحب بيعمل معجزات :)

بس احنا نحب بجد

واحـــد مـــــن الـنـــاس said...

الله الله الله الله
ايه الجمال ده
كلمات جميلة جدا جدا جدا
اول مرة اقرا حاجة وتأثر فيا بالشكل ده

انا من زمان كنت بتسائل

يعني ايه ان من المستحيلات الثلاثة
الخل الوفي ؟؟

يعني مستحيل بجد يكون فيه صديق بجد ؟؟؟

بجد بعد احتكاك بعشرات البشر في الحياة
ومنهم ناس كتيرة اوي هيقرو الكلام ده

بجد مفيش حاجة اسمها خل وفي

بجد بجد بجد

مهما حصل

..

mohand said...

السلام عليكم
هو اه صعب
وفعلا مش كتير
بس انا مش هقول ان مفيش
بس الوفاء علي اي اساس
يعني مثلا اخليه يضحي بشئ غالي عنده علشان انانية مني
اعتقد ان ده مش وفاء
عموما انا وجعتني قصة البنت قوي
وبجد تعبت قوي منها
الله المستعان
-------------
علي فكره انا رديت علي تاجك اللي بعتهولي وليكي عندي تاجين
كركركركركركر
بصره

واحدة من الناس said...

الراقص مع الذئاب
بجد مصدقتش نفسى حمد لله على السلامه وأول تعليق كمان :))
ايه يامحمد الكلام الى يزعل ده يعنى انا أقول الصندوق مليان تكسرهولى انت وبعدين أهو صاحبك الى بيسأل عليك جاه فى وقته هتلاقى غيره كتير وانت مش شايفهم يمكن الدنيا بتاخد الناس شويه بس ده مش معناه انهم مش شايلين لنا أى مشاعر أهم حاجه والى كنت عايزه أوصلها اننا نحافظ على الناس الى بتحبنا وتخاف علينا حتى لو الناس مدتناش حاجه نلفلهم احنا أحلى صندوق لأن متعه العطاء أروع من متعه الأخد تعليقك بجد أثر فيي أنا أسفه:)

********************************

الغزالى

الحب ده نعمه من عند ربنا وجميل انك مش بتحس بالوحده كتير الحمد لله:)

*******************************

أحمد
لاء يأحمد مش ده المشكله المشكله اننا منحافظش على الصندوق الى الناس بتدهولنا
تصدق انت الوحيد الى أفشتنى اهو الكلام ده كتبته ليله امتحان عندى ..دا ماشى جدا
:)))
***************************
جيجى
متخافيش ياجيجى الحب مش بينتهى مع الوقت ولا بيقل دا هو الشىء الوحيد الى مصبرهم على فراقك ترجعى بالسلامه يارب والى ينسى فكّريه مفيهاش حاجه:))

واحدة من الناس said...

سليم
:))))
من غير جو ولا حاجه والله بتحصل وخلى بالك من صحبك ومن كل حد بيسأل عليك الناس ده مش هاتلاقيها كتير
*****************************

فله
أيوه انتى كده فهمتينى ابتدى انتى وعمرك ما هاتندمى صدقينى:))

*****************************
واحد من الناس
ايه ياواحد ياأخويا الدخله ده مفيش خل طب نجيب لمون ينفع؟:)))))
لاء بحد لو انت قدرت تكون صديق وفى هاتلاقى الوفاء تانى قصدى عاشر بص فى الصندوق قبل ما ترميه

****************************
مهند
أسفه انى تعبتك وحلوه الله المستعان ده شاكلك كده بتدعى عليه لاء وكمان بتنتقم
بصره ايه بقى هى الضربه باتنين ماشى ياسيدى مقبوله منك بس أما أشوفهم الأول
:))

mohand said...

السلام عليكم
لا والله مش بدعي عليكي
وبعدين تاجين حلوين وسهلين اهوه
وايه السياسي في اجاباتي
دي اجابات شافيه جدا
ركزي بس
ولو في اجابه مش عاجباكي
نغيرها يا باشا
هو انا عندي كام واحده من الناس
تحياتي
يا اختي العزيزه

واحدة من الناس said...

وعليكم السلام يامهند
طالما انت شايفها كافيه خلاص أوكى مع انى والله ركزت أوى وقريت مرتين تلاته ما انت عارف أختك بتفهمها من قبل ما تطير:) بس يظهر ان الديفو عندى
لاء بس بجد عجبتنى طالما ده شخصيتك متغيرهاش أنا راضيه ملكش دعوه
سلام ومرسى أوى:)

3abdo me7tas said...

مش عارف أقول إيه بس كان نفسي أول ما أعلق على الموضوع بس يلا مرة تانية
الموضوع ده صحى فيها حاجات كتير اوى وخلانى افتكر ايام كنت عايز أنساها دا أنا لسه يا بنتى كاتب موضوع عن الوحدة انتى تيجي تكمليها عليا ههههههههه افتكرت أول مرة أمسك فيها إديها إفتكرت اول مرة أحس بأهميتى عندها أول مرة أحس بشوقها ليا لما كانت بتكتب ليا أول مرة احس بشفايفها على إيدي وإحنا مع بعض أول مرة ألاقى دمعه تنزل منها عشانى قدامى اقول إيه ولا إيه عرفتى انا مش عارف أنسى ليه وفى الآخر ضربتنى ضربتنى بعد ما إديتها كل حاجه كل حاجه يا شيماء
الحمد الله على كل شئ القصة بجد جميلة جدا جدا عايزين نشوف شغلك بقى أكتر وأكتر ايوا كده يا بنتى عايزين الجديد كده علطول
بجد مش عارف انا بهرتل بقول إيه بس عادى بقى انتى متفهمة الوضع اللى انا فيه
سلام

واحدة من الناس said...

عبده محتاس
يافندم التعليق الأول أو العاشر مش مهم المهم تشرفنى بوجودك بس:))
هى فعلن القصه مش وقتها خالص :)أنا أسفه هى جت كده وبعدين الحب مش رجل وامرأه فقط ده نوع واحد من الحب أنا أقصد هنا حب الأهل الأقارب الأصدقاء الناس الى بتحبنا وتتمنالنا الخير من غير حتى ما يربطنا بيهم حاجه ودول موجودين بس احنا بنقصر معاهم
انت مش بتهرتل ولا حاجه انت بس جرحك جديد ولسه بينزف وصدقنى يامحمد انك تكون مظلوم أهون ميت مره من انك تكون ظالم ربنا يهون عليك يارب شكرا:)

3abdo me7tas said...

:):)
انا عارف أنه لحب الاهل والأصدقاء وبعدين انا بهزر معاكي يا بنتى والله
ثانيا أنا جرحى مش جديد ولا حاجه يعنى بقاله كده اقريبا سنه ونص بس كل ما الجرح يتلملم يتفتح تانى بذكرى او برجوعها تتكلم معايا تانى
سيبك منى انا الموضوع لذيذ بجد وصدقينى انا إقتنعت خلاص
جزاك الله كل خير وبعدين غيه حكاية أفندم دى إنتى بتحسسينى إنى رجعت الجيش تانى انا اسمى محمد محمد بس
:))

Dalia said...

للاسف كل الحاجات دى تتحس مش ينفع تتقال و للاسف برضه فيه ناس بتحب تسمع وتشوف

انا بعدى على محل الشوكلاته و اشترى منه لصاحبتى الانتيم
لما الاقى اى هديه بسيطه بجيبهالها من غير اى مناسبه

هى بتقدر ده ... انا بحبها اوى يارب نفضل اصحاب طول العمر

ولــــــــــو said...

قصتك جميله جدا
انا باعتبر نفسي زي الام وده شئ كل لما افتكره بيأزمني صعب جدا انك تعرف ان حد شايلك كل الاحاسيس دي وبعدين تلاقي تصرفك معاه لايساوي نقطه ف بحر مايحمله لك من مشاعر
احساس قاتل والاصعب انك ماتلاقيش الفرصه انك تعوض الشخص ده عن معاناته معاك
انا باعتقد اننا احنا اللي بنخسر الناس اكتر بكتير من خسارتهم لينا
هما ممكن بسهوله يلاقوا ناس زينا واحسن بس صعب جدا انك تلاقي حد يحبك كده
انا سعيد جدا بموضوعك اللي خلاني اعيد التفكير ف علاقتي بالناس المقربين ليا واني احمد ربنا على نعمه ان يكون فيه حد كل اللي يهمه انك تكون سعيد
شاكر جدا ليكي

westtewest said...

أسف انى تعليقى هيكون صغير بس اصلى مخنوق شويه

تعليقى

قليليين اوى بس المشكله مش انهم يكونوا قليليق الشكله انك تفقدهم او مايكونش فيه حد بالنسبه ليك

واحدة من الناس said...

عبده محتاس
:):)
حاضر يامحمد يامحمد وبس

**********************
داليا
هى صحيح بتتحس بس سعات بتتشاف فى الهدايا الى من غير مناسبه فى سؤاله وقلقه علينا ربنا يخليكم لبعض يارب:))

**********************
ولو

فى كتير مننا ذى الأم ده بس قليل جدا الى ممكن يعترف أحييك على اعترفك بس ياريت تعيد حساباتك بسرعه
start today tomorrow may be too late
أنا الى شكرا لزيارتك وكلامك اللطيف ده:)

**************************
westtewest
مش عارفه ليه كل الناس مخنوقه كده أنا أسفه بجد وبالنسبه لتعليقك فالمشكله اننا نفقدهم صح بس أكيد فى ناس انت بالنسبالهم غالى أوى
مرسى على تعليقك الصغير يكفينى

wahed said...

ايه الابداع ده دايما بوستاتك جميله الحب كلمة بنفتقدها هذه الايام صعب اليوم تلاقي حد يحبك ويهتم بيك بدون مصلحه الكل اليوم بيعبد المصلحه فيه مصلحه او منفعه فهو معك غير ذلك لا طبعا فيه استثناء لكن القاعده ان الحب أختفي من حياتنا وحل محله الحقد والحسد
دايما كده أمتعينا ببوستاتك الرائعه

المتوحد said...

هاى واحدة من الناس
القصة مؤثرة جدا وعميقةجداوكمان محفزة جدا للتعليق
بتهيالى بتشير من طرف خفى لان الناس فى زحمة الحياة معتدتش بتفرق بين المادى والمعنوى يمكن بسبب غياب الروية الروحية اللى بتعنى بالنسبالى ان الحب ضرورة عشان تكون الاجابة على اسئلة البوست.....ناس كتييير اوى

رينـــــــــــا said...

بجد انا مش هقول غير جزاكى الله الف خير
من زمان مفيش حاجة أثرت فيا كدا :)
قصه البنت بكتنى اوى
وعلمتنى جدا
انى مكنش متسرعه
وادقق وافهم كويس قبل ما اتصرف غلط
بالنسبه لا سئلتك
وجعتنى اوى والله
بس انا الحمد لله يمكن انا بعمل كدا مع الناس فبتخيل ان اكيد الناس بتعمل هى كمان كدا :)
بوهم نفسى علشان متعبش من الاخر
انا اول مرة ازورك وان شاء الله مش الاخيرة
تقبلى تحياتى كلامك طلع من قلبك واخترق قلبى بجد

break said...

لأا قصة اكتر من رائعة فعلا
وتعليقك عليها كمان اكتر من رائعة
وخلا الواحد يفكر فناس كتير هوا مش مقدر اللى بيعملوه عشانه

تحياتى

بيقولوا سايكو said...

مش عارفة يا شيماء ... حسة الكلام مش صح أوى ... يعنى أنا ممكن أكون باحب حد فعلا أوى بس مش قادرة أشوفه أو أكلمه كتير لظروف خارجة عن إرادتى، و مش معنى انى بعيدة انه كده بقى بعيد عن قلبى .. فى ظروف ... و فى كمان طرق للتعبير عن الحب ... المهم انى قبل ما اقول الطرف اللى قدامى نسينى امتى، افتكر هو افتكرنى كام مرة

محض روح said...

كتير اوي مابنخدش بالنا من حجات رمزيه حولينا

المشكله فينا اننا بنشوف احنا بنفيد الي حولينا ازي وبننسى احنا محتجين ليهم اد ايه
بجد احنا ولا حاجه من غير كل الي بيحبونا

حولينا كتير
بس مش وخدين بالنا منهم
حبسين نفسنا في سرداب
طويل من الظنون
والشكوك

انا مش هقولك اني عندي صحاب كتير انا محيطي اضيق من تصورك
بس مبسوطه بلي معايا
حسه بحبهم ليا وحبي ليهم كفايا لما بقع
بشوفهم حوليا

طول عمري بحب الرموز
عندي حجات كتير شبه الصندوقك
تحياتي ياجميل

واحدة من الناس said...

واحد
مرسى قوى مع انى مش معاك ان ده القاعده وحتى لو كانت نحاول ندور على الشواذ الى انت بتقول عليهم وهم هيغنونا عن الدنيا كلها
تحياتى وأشكرك بجد:))

**************************

المتوحد
عجبتنى قوى ان الناس معدتش تفرق بين المادى والمعنوى صح عندك حق انت كده لخصت كلامى كله فى تلات كلمات مرسى قوى:))

***************************
رينا
وجزاكى خير الجزاء كم أسعدتينى بزيارتك الأولى وكلامك المهم انك تكونى بتعملى كده وأكيد فى مقابل بس انتى مش هاتشوفيه تحياتى ياأختى العزيزه:))

sendbad said...

المشكلة انك تملي الصندوق ده لغيرك وتفضلي تملي وتملي لحد ما غيرك يعتبر انده حق مكتسب ولو قصرتي في يوم تبقي وحشة ومعندكيش اصل المشكلة اننا مش قادرين نتواصل بطلنا نتواصل بقينا زي قضبان السكة الحديد الدنيا ماشية تخبط فينا ومش قادرين نتلاقي
ومع ذلك كل قاعدة وليها استثناء بس ليه الاستتثناء قليل اوي كده
انا بتكلم من وجهة نظري ويمكن اكون غلط

واحدة من الناس said...

break
شكرا أوى بس ياريت نفكر بسرعه ومنتأخرش عليهم:))

*************************
بيقولوا سايكو
أيات ياحبيبتى أنا عارفه ان الدنيا كتير بتخدنا وبتخلينا نقصر مع ناس احنا متأكدين انهم بيحبونا حتى لو مشوفتهمش ومكلمتهمش هم حاطين جانبهم الصندوق الى انتى اديتهلهم وكل يوم بيأخده منه الى يكفيهم وبيكون كل الى هم عايزينه ان الصندوق بتاعهم يكون جانبك لو اتأكدوا من كده هايبقى كفايه
يارب تكونى فهمتينى سلام

********************************
محض روح
انا الى تحياتى لتعليق من التعليقات القليله قوى الى أسعدتنى ربنا يخليكم لبعض دايما يارب ويخليلك الصناديق
مرسى قوى:)))

واحدة من الناس said...

سندباد
صعب قوى الى انت قولته ده مش ممكن الحب يكون حق مكتسب مفيش حاجه اسمها حبنى أحبك ده تبقى تجاره مش حب ولو فى ناس بتطبق النظريه ده متستهلش حاجه
أكيد فى تواصل ياسندباد بس احنا يمكن نكون اختارنا الخط الى غلط ان شاء الله ربنا يوفقنا المره الى جايه خلى عندك أمل:))

•«ρяoιd»•™ said...

السلام عليكم و رحمة الله و بركاته

بجد بجد

جميله قووووووووووووووووووووووي

معناها حلو قوي قوي قوي

و يا ريت كلنا بجند نفهم ايه المعني اللي وراها

عشان خلاص بجد بقي قليل قوي اللي بيحس

للأسف يعني

تحياتي

كلام لوجيك said...

السلام عليكم
سامحينى مش هعلق المرادي
رغم ان البوست بتاعك هايل جدا بدون مبالغة
انا بس جاي اسلم واثبت حضور

خالص مودتى

ومن الشباك said...

اجابة السؤال الاول
لا يوجد

السؤال الثاني

لا يوجد

السؤال الثالث

لا يوجد

---------------------------

انا بأى مش عارف دا تقصير مني ولا غباء من الاخرين

:):):):):):)

موضوع جامد بس بيفتح في ملفات قديمة ومش عارف ليه البلوج بتاعك بيعد يفتح في ملفاتي القديمة

حد مسلطك عليا
:d:D:D:D:D

محمد شبل

The Terminator said...

انا اتأثرت أوي بجد من القصة
انتي فرحتيني وزعلتيني في نفس الوقت
فرحت لأنك فكرتيني بناس كتير مهتمين بيا أوي وهما دول فعلا كنزي في الحياة
زعلت لأنك فكرتيني بناس انا مهتم بيهم وهما لأ
مرسية كتير للانتعاشة اللي عملتيهالي دي

بوست رقيق تحياتي

واحدة من الناس said...

proid
وعليكم السلام ورحمه الله وبركاته:)
مرسى قوى قوى قوى وعندك حق فعلن قليل قوى الى بقى يحس:)أشكرك

***********************
كلام لوجيك
ياسيدى أنا مسمحاك ويكفينى ويشرفنى جدا وجودك حتى لو مقولتش حاجه ربنا يهديك كده يارب وأردلك وجودك بتعلق عندك:))

***********************
ومن الشباك
ههههههه
الإحابات كلها موجوده بس انت الى مش شايفهم الى بيبكى على مخدته انت مش هاتشوفه والى بيتلكك عشان يسمع صوتك مش هايعترفلك بكده ذى ما داليا قالت ده حاجات بتحس مش بتتشاف ركز انت بس وأنا وراك والزمن طويل:)))

***************************
the terminator
أنا الى مرسي كتير وأسفه على الزعل الى سببته بس ياريت نبتدى التنفيذ
تحياتى وأرجو التواصل:))

ياسر سليم said...

انا هتكلم عشان تشوفينى
أولاً باين دى اول زياره ليا للمدونة

وعجبنى قوى البوست ده

ولما طرحتى الاسئله بتاعت كم واحد .. وكم واحد ..

قلت ايه ده .. ده باين ما فيش حد بيحبنى ..

وقعدت افكر لقيت ان فى ناس بتحبى بس مش بيعملوا الكلام ده

ولما فكرت اكتر واكتر لقيت انى لو عايز ان الناس تحبنى بجد احبهم انا الأول بجد

تحياتى

sendrlla said...


الله القصه دى جميله اوى اوى اوى ورقيقه خالص

بس عايزه اقولك ان كل اسئلتك دى ليها اجابه واحده مافيش

ممكن يكون الصندوق بتاعنا مليان قبلات وحب ومشاعر بس مش لاقيين اللى يستاهلها او اللى يحب ياخدها

Dalia said...

ازيك يا جميل ؟؟
انتى فين انا بعتت لك تاج تعالى يلا خديه احسن تقيل عليا اوى
:D

sendbad said...

انا قلتلك ان في استثناء وهو ده اللي مخلينا عندنا امل

واحدة من الناس said...

ياسر سليم
شرفتنى وأنا أوكد لك ان ده أول زياره بس ياريت متكنش الأخيره وبعدين انت جبت من الآخر صح جدا
the only way 2 have a friend is to be one

************************
سندريلا
أولا وحشتينى
ثانيا متقوليش كده بس ذى ما قلت ميت مره احنا الى مش شايفين متعه العطاء أجمل
The best thing is 2 love rather than 2 be loved

***********************
داليا
فى السكه يا جميله وهارودلك عليه ان شاء الله مرسى:))

***********************
سندباد
الحمد لله:)

زحل الفلكي said...

البوست ده بيوجع
خصوصاً في الوقت ده بالذات

حزيــــــــــــــــــن said...

انا عارف انى اتأخرت عليكى جدا
بس انا خلاص عملت لينك فى مدونتى ليكى عشان اقدر اتابعك باستمرار

واحدة من الناس said...

زحل الفلكى

أسفه جدا بس والله كان قصدى أقولك ان فى ناس تانيه احنا مش شايفنهم المفروض نهتم بيهم أكتر من حزننا على ناس متستهلش باكرر أسفى

****************************
حزين
أهلا بيك متشكره أوى أنا كمان مقصره بس ان شاء الله هاجيلك قريب:)

صاحب البوابــة said...

موضوع جميل للغاية

واعجبني فكرته جداااااا

تحياتي

medo serag said...

السلام عليكم ورحمة الله
اختى بجد القصه مستنى اوى
.............
كام حد وهو بيسلم عليك ضمك اوى ودقق فى عنيك عشان يحس بوجودك ؟
كام حد بكى على مخدته لما لقاك فى يوم حزين ؟
كام حد اتلكك وجاب حجه هبله عشان يكلمك ويسمع صوتك ؟
احساس صعب اوى يا اختى لما الواحد يحب ومشاعره متوصلش للى بيحبه
بشكرك اوى اوى على البوست الجميل والقصه الجميله اوى
اللى صحت جوايا حاجات كتير يمكن مكنتش عايزها تصحى
مش كنت اخليها نايمه احسن هههههه
مش كده ولا ايه .......... ؟
تحياتى

واحدة من الناس said...

ميدو
والأصعب ياعزيزى اننا منفهمش ان الى قدامنا بيحبنا
لاء صحيها أحسن ولو اتظلمت سامح ولو ظلمت صلح
تحياتى:)

medo serag said...

السلام عليكم
مش يمكن لو صحيتها تتغير حاجات كتير
واتسبب فى جرح حد مش عايز اجرحه
لو فضلت على كده ذكريات بس احسن
وخليها نايمه بقى ،،،،،،، لو صحيت هتعمل قلق ..... هههههه

تحياتى

Anonymous said...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘