لبسنا التاج الحمد لله وفاضلى شويه كماليات يعنى عرش صغير كده على أدى وشويه خدم وحشم وجوارى على حته مملكه صغيره وبالمره حبه ناس أحكمهم. بسيطه خالص....الاَ هو انتوا سمتوه تاج ليه؟
أنا عاجبنى فكره التاج ده أصل المدونين عندى ذى الممثلين الى بيعجبونى وبحب أعرف أرائهم و شخصيتهم الحقيقيه
مرسى بجد لروزا وشيرمين انهم مررهولى وأسفه على التأخير الكبير ده
أحب شخص لقلبك في الدنيا؟
ازاى يعنى هايكون شخص واحد انا كل حد قابلته حبيت فيه حاجه ومحبتهاش من حد غيره ناس حبيت شقاوتهم وناس هدوءهم ناس أحب أغلس عليهم وناس أحب أهزر معاهم بس ده ميمنعش ان فى ناس بحب كل الى فيهم مهما كان وحش أو حلو دول عيلتى الصغيره وجدتى وخالى وجدتى التانيه وأيات وهند وايمان ونهى صحابى
***
إنسان مستعد تضحي بحياتك - ركز فى كلمة حياتك - عشانه؟
أى هدف أو انسان أؤمن بيه وأحس ان حياته هاتكون أفضل من حياتى
***
إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي
غليل قلبك؟
أى حد أذى مسلم أو مسلمه ظلم سواء يهودى أو عربى أو مسلم ذيه
***
ما هو:اسم أجمل كتاب كتبه بشر قرأته ومحتفظ به حتى الان؟
هبى ياريح الإيمان لد/خالد أبو شادى
***
اسم كتاب - كتبه بشر برضه - انت متعلق بيه وبتقرأه كل فترة؟
لا تحزن لعائض القرنى
***
أهم جهاز منزلى أنت متعلق بيه أو بتستخدمه كتير؟
الكمبيوتر
***
شيء تحس بالراحة النفسية عندما تنظر إليه؟
سجاده الصلاه والمصحف
***
مكان تحس فيه بالحنين الى شيء لا تدرى ماهو و ذكريات جارفة الى لاشيء؟
النيل النيل النيل النيل
***
مكان تحس بالراحة عندما تدخله؟
أى مكان فيه أشجار وورد
***
اجمل مدينة زرتها داخل مصر ؟
اسكندريه
***
نوع هاتفك المحمول؟
Nokia connecting ppl
***
سرعة بروسيسور جهازك؟
أهو أنا فى البى سى ده معرفش أعمل غير 4حاجات
أفتح سى ديهات- أدخل على النت- أكتب على الورد- واخربه
ومش ناويه أعرف .أصلى مره طلعتلى مستج بتقول ان السى مليان قلت لازم أعمل ذى ما الناس بتعمل وأفهم فى السيستم وبتاع دخلت فى السى لقيت فولدر مفهمتوش كده اسمه ويندوز حسيت انه ملوش لزمه وعملتله ديليت الكمبيوتر قفل ما فتحش ومهندس الكمبيوتر كان هايجيله هارت أتتاك.... مش عارفه ليه؟
***
حجم ذاكرة -هارد- جهازك؟
انظر الإجابه السابقه وكفايه احراج بأه
***
المساحة التى تشغلها المواد الاسلامية على جهازك؟
وبعديييين
***
نفس المساحة السالف ذكرها فى قلبك -الإجابة لنفسك عشان الرياء يا اخواننا -؟
اللهم اجعلنى خيرا مما يظنون واغفرلى ما لا يعلمون
***
أهم هدف انت واضعه لحياتك الآن؟
السؤال الى بكانى وسرق النوم من عينى ليالى
حاليا يعنى نفسى ألف العالم وأفهم العالم الثقافه المصريه والإسلام صح مش عايزاهم يزوروا بلدى ولا يخشوا فى دينى بس عايزاهم يفهموا صح
***
مواصفات فتى \فتاة الأحلام بالنسبة لك؟
يعاملنى ذى ما الإسلام بيقول, يحبنى, طيب, واقعى, صريح, جرئ, مش بيشرب سجاير, متفائل ومبتسم دائما يدخل أى انترفيو يسد علطول:)
مش عايزاه غنى ولا عنده فيلا وعربيه وبتاع عايزه نبتدى حياتنا مع بعض أشتغل وأكبر بيه ومعاه. غاويه شقا بأه أعمل ايه:)
***
صف ما يأتى:شعورك لما بتسمع كلمة مصر ؟
باشتقلها رغم انى فى حضنها باشتاق لمصر الى فى كتب التاريخ وحديث الرسول الى باشوفها فى الصحف القوميه والقنوات المحليه أصلى الى بانزل من بتنا ألاقيها ده حاجه تانيه خالص
***
شعورك لما بتسمع كلام عن اليهود؟
احساس أسد مسجون والمفتاح فى ايد حشره حقيره
***
شعورك لما بتشوف ظابط شرطة؟
ولا حاجه عادى طالما معمليش حاجه ولا عمل قدامى لحد حاجه هاحس ناحيته بحاجه وحشه أو حلوه ليه
***
شعورك لما بتشوف الكناس العجوز فى الطريق؟
الحسره
وبفتكر حقوق الإنسان الى حرمته من حقوق أحقر الحيوانات
***
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
هو حر فى لبسه بس ميقولش سنه ولو قال هاقوله متركبش عربيه عشان الرسول مركبهاش وروح حج بالجمل
الرسول سنته تتبع فى الدين مش فى الدنيا هو نفسه قال أنتم أعلم بشئون دنياك أو كما قال ص
***
إحساس يراودك فى إشارة مرور مغلقة بسبب مسئول كبير؟
بحمد ربنا وبفرح انى صغيره ومحدش بيدعى عليه ولا بيكشر بسببى
عايزه أمرره ل
أيات
مهند
سليم
زحل الفلكى
كلام لوجيك
جىجى
الغزالى
وأى حد عايزه والى مش عايز يرد عادى
7 comments:
السلام عليكم
ايه يا بنتي الحاجات دي كلها
علي فكره انا البوست ده اتبعثلي من اكتر من مكان
وهرد عليه باذن الله
عجبني قوي ردك علي موضوع ظابط الشرطه
اول حد يكتب التاج ده واحسه موضوعي في الموضوع ده
تحياتي
ولو ان اجابتك في موضوع الجلباب مش متفقه معايا
بس انت حر يا باشا
تحياتي
تاج زي الفل
اجاباتك كلها جميلة وفيها مسحة من الشقاوة
وعجبتنى جدا اجابتك على سؤال
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
انا بس ليا تعقيب صغير
طبعا اتباع سنة الرسول عليه الصلاة والسلام واجبه واللى بيطبقها ربنا بيدخله فى شفاعة نبينا الكريم
بس انا بعترض على المتزمتين جدا زيادة عن اللازم
الاسلام دين السماحة والرحمة
دين التخفيف والتيسير على العباد
الدين معامله كما يقولون
ملحوظه اخيرة
بلاش تمسحى اي حاجه من على الجهاز يكون اسمها ويندوز
عشان السيستم بياخد على خاطره قوي من الحركات دي
ونراكى فى تاج اخر
خالص مودتى
:)
اولا حمد الله عالسلامه يا شايماء
يا رب تكوني عملتي حلو في الامتحان
ردود جميله ومميزه من انسانه مميزه
عجبني قوي ردك بالذات في موضوع الشاب الي بيلبس جلبيه قصيره
تحياتي يا قمر
وحمد اله عاسلامة
تمام
عجبنى قوى 99.9% من كلامك
لأ بجد اسلوبك رائع ومشوق جدا
ومواصفات فتى احلامك مش فيا :(
دة إللى زعلنى :D
وعجبنى :
شعورك لما بتسمع كلام عن اليهود؟
احساس أسد مسجون والمفتاح فى ايد حشره حقيرة .
هو مش حشرة قوى يعنى :)
هو انتى عايزه يفتحلك وتروحى تستشهدى بإيد واحد فلسطينى من اللى يبقتلوا فى بعض هناك ! دا الوفد المصرى (مجموعة اسود زينا ) اتعرضوا للموت كذا مرة من الفلسطينيين وهما مش عارفين هما بيعملوا إيه اصلا !
يا ستى خليه قافل علينا لحد ما نعد القوة لأن قوتنا هتكون إيماننا مش سلاحنا وللأسف الأسود فى بلدنا قليلون شوية وفى كتير لابسين ماسك اسود لكنهم كلاب وقطط :(
جزاكى الله خيرا كان نفسى اعرف عنك اكتر
وشكرا على التاج وإن شاء الله ارد عليه قريبا :)
معلش
نسيت اقولك ان عجبنى قوى مبدئك عن الراجل ابو جلابية بيضة
هى كلمة (مبدئك) كدة صح ؟
مبدأ ومبادئ ممممم
اسف ملخبطلك مدونتك بتعليقاتى الساذجة :)
مهند
على فكره أنا عارفه انك مش بترد على تاجات وبتنفض لأى حد بيبعتلك أى تاج بس ولا تفرق معايا برده مررتهولك فى انتظارك:))
أسامه
*****
مش هارود عليك عشان احنا متخاسمين
.
.
مرسى على كلامك وعلى الملحوظه أنا خلاص حرمت بقيت أدخل أقول صباح الخير ياوندوز انت فى يور بيزنس وأنا فى ماى بزنس:)
رديت برده مفيش فايده فيه:((
روزتى الجميله
*************
انتى الى جميله أوى بجد ومرسى على تاج
سليم
*****
99,9%
ايه البخل ده بعد الشر عليك من الزعل ياسيدى أدينا بنحلم
:))
مهوه أسد ضعيف وغبى عشان كده اتحبس بالطريقه المؤسفه ده يارب يقوى ويكسر الجدران
لفيت وملقتش غيرى الى تفتيك فى اللغه العربيه النمره غلط يافندم
وبعدين انت أصلن أصلن أصلن لو بطلت تكتب تعليقاتك عندى أنا هاقفل الدونه وهاعتزل
سلام:)
جزمة حضرتك بتدل على انوثة طاغية ... ييييييييه مش دى ... قصدى ردود حضرتك بتدل على شخصية جميلة و طيبة مووت .... يابختك :)
Post a Comment