Monday, August 6, 2007

بتشبهى علىَ

يمكن الشعر العامى بيوصل للقلب أسرع وأغلبيه الناس بيفضلوه لقيت قلمى قرر يخوض أول تجربه ويكتب أول خاطره بالعاميه
**************************************************
بتشبهى علىَ...حاسه انك تعرفينى
بصيلى كويس هتلاقى صورتك
فى جسمى وروحى وكيانــــى
راح تلاقى سواد ليلك
صبغ لون عيونـــــى
وشعاع القمر على نيلك
كحل على جفونـــــى
ورفعة راس نخيلك
ورثاها من جدودى
****
ذى مئذنة جوامعك بصوت الحق ناطقة ومتمسكة
وذى بخورك الى يحرقنى أردهاله بريحه طيبة
واخده من صيادك الصبر وعلى ربى متوكلة
ومن فلاحك واخده الإبتسامة ولو فى مليون مشكلة
****
أنا ذى بحر اسكندرية شقية
وذى نيلك صفيه ونقية
ولا عمرى أنام وفى قلبى كره وأحقاد مستخبية
بالحب عايشه ودايما بالسماح والسلام مبتديه
أنا منك يابلدى وانتى منى
عرفتينى......أنا مصريــــــــــــــــــــــــــــة

45 comments:

شمعة أمـــــل said...

بجد البوست ده خلانى مزعلش من تاخيرك علينا فى بوستاتك
بجد الشعر جميل اوى وانتى هايله
مش عايزين غياب تانى

keda-sponser said...

الشعر يتكتب بأي طريقه ... عاميه أو فصحى و عندنا شعراء كبار كتبوا بالعاميه

بالنسبه للشعر إللي أن كاتباه فهو جميل جدا .... من زمان ماشوفتش حد بيكتب لمصر ... كل الناس عماله تحب في بعضها وخلاص

و الكلام بيمشي مع الواحد بسهوله .... بجد روعه
و يا ريت تكرريها
أنا أول مره أزور المدونه هنا ... بس واضح أني هاجي هنا كتير قويييي

سلاااااااااااااام

كلام لوجيك said...

السلام عليكم ورحمة الله وبركاته
ازيك يا اختى العزيزة؟؟
انا جيت اسلم بس
بعتذر عن طول فترة غيابى وذلك لسوء الأحوال الجوية
:)
اتمنى ان تكونى بخير وفى افضل حال

دمتى فى حفظ الله

واحدة من الناس said...

شمعه أمل
وأنا مقدرش على زعلك ياشمعتى العزيزه عارفه انك كتبتى التعليق بعد البوست ما نزل بعشر دقايق :) مرسى على متابعتك ونشاطك وكلماتك المشجعه ان شاء الله مش هتأخر تانى:)))

************************
كده سبونسر
:))))
يافندم المدونه نورت بالتعليق بس حلو برضه ان الناس تحب فى بعضها وأتمنى انك تيجى هنا كتير
شكرا شكرا:))

******************
كلام لوجيك
أساااااااااااااامه
:DDDDDDDDDDDDDD
لاء انا فرحانه بجد بوجودك قويييييييييي حمد لله على السلامه أنا بخير اهوه والأحوال فل عايزه أعرف أخبارك انت
وايه سوء الأحوال الجويه ده باحس انى باتفرج على الجزيره ياأخى ههههه

mo'men mohamed said...

انا مصرى مسلم أعتز بهويتى تلك
جزاك الله كل خير
السلام عليكم

coca said...

لما عملت البلوج وابل ما اعمله لاقيت ان في ناس كتير بتحب مصر اد ما بحبها واكتر وقال حاجات كتير علي لساني
بوست جميل واحساس اجمل
تحياتي

Hadota .. حدوتة said...

السلام عليكم
ازيك يا جميل
جميل اوى الشعر دا وتجربة حلوة ييارب تتكرر كتير


بالنسبة للبوست فتعليقى انى لو لم اكن مصريا لوددت ان اكون مصريا بحبك يا مصر
بكل حاجة فيكى
نيلك وشعبك وحتى ترابك
:)

تحياتى ليكى

mohand said...

السلام عليكم
بدايه موفقه

تحياتي
وليا عوده
بس علشان مستعجل

زحل الفلكي said...

وشعاع القمر على نيلك
كحل على جفونـــــى
ورفعة راس نخيلك
ورثاها من جدودى


بجد تحفة اوي
جميلة اوي اوي

استمري اكيد عندك كتيير بنفس الحلاوة دي
بجد رائع

Marvel said...

جميلة جدا جدا جدا...عجبتني قوي بجد
:D

momken said...

البوست حلو اوى ماشاء الله عليكى
كلامك حلو ومشاعرك حلوة اوى وقريبه اوى

ومصر والله تستاهل تكون امنا وحته مننا
كفايه الى هى شيفاه علشانا

انا هتابع كتابتك ديما
تحياتى

momken said...

مش هقول الغربه صعبه
مش هقول
مش هقول الغربه مره
مش هقول
رايح اصبر
رايح اقدر
مهما ليل الغربه يقصر
او يطول
لنا عينك كلمتنى
ليل الغربه علمتنى
علمتنى الغربه احبك
علمتنى اشتقاق لحضنك
لون حفونك
شوق عيونك
كل حاجه فيكى احلى
من ليالى الغربه
يامصر


تحياتى

الراقص مع الذئاب said...

السلام عليكم
هو كلكم بقيتم فنانين يا جماعة
معقولة كل ما ادخل مدونة الاقي صاحبها كاتب خواطر وشعر

ماشاء الله كلمات جميلة ومعبرة ...وخصوصا انها في حب مصر

ايوة كدا عاوزين الحجات المستخبية تطلع...والمواهب المدفونة تشوف النور

جزاكي الله خيرا يا شيماء


دمتي في خير

mohand said...

السلام عليكم

كتبتيها ازاي دي

ورفعة راس نخيلك
ورثاها من جدودى


ايه اللي اوحالك بيها

لا شكلك بتذاكري من ورانا

واحدة من الناس said...

مؤمن
وأنا مثلك:))
وجزاك خير الجزاء يارب ودايما تسعدنى بتعليقاتك كده:)

********************
كوكا
أكيد طبعا فى كتير وأشكرك على تشجيعك ومرسى على أول زياره:))

*********************
حدودتى الجميله
الله يخليكى ياغاليه ان شاء الله هاحاول أكررها وتكونى دايما مشجعانى كده:)

واحدة من الناس said...

مهند
فى انتظارك ويكفينى فتحك للبلوج واغلاقه حتى لو مكتبتش حاجه:)))

*****************
زحـــــــل
ربنا يكرمك يارب مرسى يامحمد قوى أكيد بجد هاحاول أكتب تانى أسعدتنى بوجودك يافندم:))

*****************
مارفل
دا التعليق هو الى جميل قوى قوى بجد وعجبنى مرسى قوى:))

واحدة من الناس said...

ممكن
طب يعنى هاروح جنبك فين:) حلو أكتر الى انتى كاتباه وشكرا قوى انك كتبتيه عندى بجد حسيت بكل كلمه فيها أحييكى واتمنا الزيارات تتكرر:)))

*******************
راقصى مع الذئاب
ياهلا:)
يافندم ده حاجه على قدنا كده من بعض ما عندكم يعنى :))
نورتنى يامحمد بجد بفرح لما ألاقيك عندى

********************
مهند
والله الى ذاكر ذاكر وياريت تبص فى ورقتك :)))
بس بحد أكتر حاجه بتعجبنى فى المصريين ان عندهم كرامه والموت عندهم أهون من ان راسهم تنزل قدام أى حد
شكرا يامهند جزاك الله خيرا:)

قلب أبيــض said...

السلام عليكم
ايه الحلاوة دى
دانتى فقتى كل الشعراء
الشيخ امين الديب
وعى مبارك
وزكى جمعة
مين زكى جمعةدة...!
المهم بجد والله لو دى البداية متتردديش فى انك تكملى
فما ايسر الكلمات على البال
زلكن من الذى يبدأ
عموما
مدونتك جميلة والاجمل البانر بصراحة
يلا
اخوكى
قلب ابيض

wahed said...

ازيك شيماء اخبارك ايه

تسجيل حضور وهاجي اعلق عندك بعد شويه عشان مرهق من السفر شويه

متشكر جدا علي سؤالك عني

wahed said...

انا جيت اهو بس خلي التعليق بكره لاني والله فاتح عينيا بالعافيه

mohand said...

السلام عليكم

الا بالحق هو انتي مشربتيش من نيلها؟

اصل انا شربت

من كيعاني

احساس لسه حى said...

عزيزتى
انتى واخده من دول فى زمنهم الللى انتها ولا الصياد بقا يصبر ولا الفلاح عارف يبتسم ولا البحر عارف يتشاقا من الزحمة ولا النيل بقا نقى من النفايات يعنى باظت بدايه جميلة
وهادئه
سلام

wahed said...

جميل البوست

منتظر ابداعات اخري

تحياتي ليكي يا شاعره

hana said...

كلام جميل ومرتب
تجربة حلوة وبداية احلى
وياريت دايما تكتبى خواطر
وبعدين الخواطر بالعامية لها مذاق حلو.
يمكن احلى من الفصحى
المهم الاحساسينطبع على الحروف
تحياتى وتقديرى

محمد المصري said...

أحسنتِ وأبدعت واللهأخت واحدة من الناس والله معك..وننتظر منك ابداعات جديدة أوكى؟
بالمناسبة أرجو من حضرتك أن تتفضلي بزيارة مدونيت الجديدة:
http://safa7aty.blogspot.com
وشكراً..
محمد المصري

واحدة من الناس said...

قلب أبيض
ياسلام ياسلام دا ايه دا كله هههه
الله يخليك ياأبو قلب أبيض انت:)
مرسى على تشجيعك اللطيف ده
ان شاء الله هاحاول أكررها:)

*****************
واحد
حمد لله على السلامه ياباشا فى انتظارك مرسى قوى:)

*****************
مهند
!!!!!!
عروستى

واحدة من الناس said...

احساسى لسه حى
:((((
عندك حق فى كل كلمه بس مش عارفه يوم ما فكرت أكتبلها مفتكرتش غير فى مصر الجميله الى احنا مشوهنهاش على فكره انا لسه شايفاها جميله:)

****************
هنا
ربنا يخليكى ياجميله بس بصراحه يعنى أنا بافضل الفصحى مرسى على تشجيعك وذوقك:)

*****************
محمد المصرى
أشكرك على أول زياره وكلامك اللطيف ده وحضرتى جايه لحضرتك حالاً:))

Reemo said...

هو فعلا اللهجه العاميه أقرب للناس من العربيه الفصحى
يمكن لانها بتكون اقرب لطريقه الكلام المتداوله
واللى بتوفر على كتير صعوبه البحث عن معانى بعض المفردات فى الشعر
كتابتك فى العاميه جميله
بحييكى عليها
تحياتى

islamventura said...

احلى حاجة اسكندرية فى يوم شتاء الساعة 10 الصبح فى محطة الرمل لبحرى

ولــــــــــو said...

مصر ابدا مابتنساش ولادها هما كانوا بيقولوا كده زمان
كلامك جميل جدا وكل مره اكتشف موهبه جديده
بالتوفيق واسف على التأخير

gohayna said...

مبرووك علي نجاح التجربه يا قمر

صحيح جايه متاخر اوي

بس اعذريني يا جميله

انتي عارفه لما كنت في مصر مكنتش بحس اوي بالكلام ادا

لكن لما طلعت منها حسيت

بجد حسيت بكل كلمه كتبتيها

واثرت فيا يا جميله

تسلم ايدك

ومنتظرين منك كتير اوي

تحياتي يا جميله

مؤمنه said...

السلام عليكم ورحمهة الله وبركاته
كلامك كله جميل ياقمر ورقيق ويخل القلب بسرعه لأنه بيتفهم بسهوله وربنا يوفقك نحب نرى المزيد والمزيد انشاء الله ربنا يوفقك
والسلام عليكم ورحمة الله وبركاته

The Manager said...

ما شاء الله
مكنتش اعرف انك موهوبة كدة

حقيقة فى ملكة كويسة عندك ياريت تنميها وتكتبي كتير اكيد هتستفادي واحنا كمان هنستفاد معاكي

انتى اصلا اسلوبك عموما ماشاء الله فيه الصور حلوة قوي حتى لو مش شعر
فلما كتبتى شعر كان جميل قوي وبسيط كمان

واتكلمتى عن حاجات فى مصر هي من اجمل الحاجات فعلا زي الجوامع وروايح بخورها والنيل طبعا والنخيل

حقيقى مقدرش اقول غير ما شاء الله

واسف للتأخير :(

تحياتى ليكى وجزاكي الله عني خيرا :)

واحدة من الناس said...

reemo
تسلميلى ياغاليه بس انا شايفه ان برضه الشعر لغه راقيه تناسب الفصحى وبحب تعليقك شكرا ربنا يخليكى

*******************
islam ventura
الله الله
بصراحه مجربتش ههههه
بس اى حاجه فيها سيره اسكندريه اكيد هتكون تحفه:)

****************
ولو
يافندم انا فى انتظارك ومرسى على تعليقك يارب بس يكون المانع خير

واحدة من الناس said...

جيجيييييييييييي
:):):):):):):):):):):):):):):):)
فرحانه بوجودك قويييييييييييييي ربنا يخليكى بستناكى بجد ياغاليه
متحرمش من تعليقك ابدا يارب:)

*******************
مؤمنه
ربنا يخليكى ياجميله دا انتى الى دخلتى قلبى بسرعه ان شاء الله هاحاول اكتب تانى ياريت تنورينى دايما:)

*******************
سليم
أهلا يابشمهندس ما بدرى دا احنا خلاص كنا بنشطب وماشيين
هههههه
المهم تكون بخير ملكه ايه بس ده حاجه صغيره كده على ادينا مرسى على تشجيعك وان شاء الله هاحاول اكررها
تسلملى ياسليم وجزاك يارب بس من غير تأخير:)

medo serag said...

الشعر جميل اوى وليا زمان مقرتش شعر بالعاميه والاجمل انه عن مصر ميرسى اوى على الشعر الجميل ده وربنا يوفقك وتكتبى اكتر واكتر ده اول موضوع اقراه ليكى وربنا يوفقك

واحدة من الناس said...

ميدو
بجد انا سعيده جدا جدا جدا بوجودك مش مصدقه انك قريتلى كل ده مرسى ياميدو موووت يارب تنورنى على طول وهاروح ارد على كل تعليقاتك ان شاء الله:)))))))))))))))

sendbad said...

طالما غايبة بقالك فترة ومبتجيش عندنا قلت اجي انا
فوجئت بالبوست الجميل ده
جميل اوي انك تقدري تنوعي في اختيارتك وكتابتك بحيث الواحدمننا ميتوقعش ايه اللي ممكن يلاقيه في المدونة
تحياتي

شمعة أمـــــل said...

ايه فينك يا شيماء مختفيه فين؟
مش عايزينك تتاخرى علينا
عايزاكى تمتعينا ببوستاتك الجميله
مستنيه البوست الجديد

medo serag said...

السلام عليكم
اكيد انا اسعد طبعا انى اتشرفت بقراية مواضيعك الجميله
ويارب دايما مواضيع جميله وبتمنالك التوفيق يارب
وياريت تشرفينى فى مدونتى الصغننه اللى على ادى فى جيران
http://www.medoserag.jeeran.com/
وهستنى تعليقاتك
تحياتى

david santos said...

I passed to congratulate it with its work and to desire a good August to it in vacation.

محمد المصري said...

ما شاء الله والله كلمات جميلة رغم إنها شعر عامي! أحسنت يا أختي والله وربنا يوفقك! على فكرة صورة الهيدر عندك جميلة ^^
شكراً..
محمد المصري

أحمد سلامــه said...

الاحساس في البوست جميل
بس مش هعرف امسك نفسي
في مزياكا لازم تتظبط في وزن الشعر العامي
لانه غير الشعر العربي بينطق ليس كما يكتب
---------
زي مئذنة
بالعامية تبقى مدنة
---------
التجربة حلوة يا شيماء
بس لام قراية اكتر
وتظيبيطات في الوزن اكتر عشان بس تفرضي نوع من الموسيقي في قراية القصيدة العامية تبعدها عن كونها نثر عامي
تحياتي لكي

واحدة من الناس said...

سندباد
معلش اعزرنى انا جيت أهوه وشكرا قوى على كلامك ربنا يخليك

*********
شمعتى الجميله
انا موجوده بس البوست الى جاى مش هايكون حلو خالص باحاول مكتبش غير حاجه تستاهل انك تقريها

****************
ميدو
بجد انا حظى حلو قوى انى قريت كلامك سيبت تعليقاتى وهاسبها دايما ان شاء الله:)

واحدة من الناس said...

David
thx so much ur comment is so nice

**********
محمد
شكرا يامحمد ربنا يخليك
تصدق كنت بافكر أغير الصوره بس طالما عجبيك هاسبها:)
مرسى قوى

**********
أحمااااااااااااااااااااد
ياه المدونه كانت بتسألنى عليك
:)
وبعدين ايه امسك نفسى ده كنت هازعل جدا لو عملت كده تعليقك عجبنى جدا وان شاء الله هاحاول اقرا كتير عشان يكون أحسن
مرسى ياأحمد قوى:)