Friday, August 17, 2007

بالصدفه قابلتها

فى مدونه بالصدفه قابلتها
دقيت على بابها وفتحتها
قبل ما أقرا كلمه كلمه قلبى ارتحلها
كان صحبتها اسمى على اسمها
****
بدأت تمشى على السطور عيونى
كان أول كلمه لقتها وحشتونى
وتانى جمله أنا مريضه ادعولى
والتالته كانت بدعاكوا خففتوا عنى وأسعدتونى
****
حسيت بجسمى انتفض ذى الطير
وأنفاسى كأنهافى سباق خيل
وكل شىء بيصرخ ان الى جاى مش خير
****
أنا أحمد أخو شيماء
شيماء رحلت عند رب السماء
وتدفق الدعاء بالرحمه بدل الشفاء
****
القصه انتهت أنا جيت فى أخرها بس جوايا ابتدت سرحت بخيالى بعيد ياترى هى زعلانه من كام واحد وكام واحد زعلان منها ياترى نامت وهى ناويه تصحى تصالح مين؟كنت أعرف واحده اتخانقت خناقه عاديه مع والدها وقالت لما أشوفه فى الفجر هاصالحه وأعتذله ومشفتوش ....للأبد
آسف شكرا بحبك
أصعب كلمات فى الدنيا وليها وقت واحد تتقال فيه لو اتأخرت بيكون ملهاش معنى مبيقلهاش غير انسان قوى وعارف أد ايه الدنيا ده حقيره أحقر من الحزن والغضب والعتاب. محدش بيفكر فى الى ممكن يحصل لنا أو لحد غالى علينا فى الثانيه الى جايه
هى وصّت أخوها يبلغ الناس الى هى عارفه انهم هايسألوا عليها بس أكيد فى ناس تانيه ملحقوش يعرّفوها. ذنبهم مش ذنبها
مش كل حاجه هانقدر نعملها بكره
ياريت نصفى قلوبنا ونحافظ على الناس الى بيحبونا والله ممكن يختفوا أو نختفى فى لحظه
هاسيبكوا مع بوست قديم لأنى مكتبتش حاجه
شيماء أيتها الرقيقه رحمك الله كنت اتمنى انى أكون عارفاكى بس جيت متأخر

18 comments:

gohayna said...

ربنا يرحمها رحمه وسعت ما بين السماوات والارض


واكيد لو شافت الي بيحصل ومدي امتنان وحب الناس ليها بعد وفتها كانت هتكون سعيده جدا اكيد


اما انتي

فربنا يجازيكي الف خير علي احساسك وشعورك النبيل دا

انتي بجد انسانه محترمه


تحياتي ليكي

شمعة أمـــــل said...

ربنا يرحمها ويغفر لها ويجعلها مع الصديصقين والشهداء
ويجعل موتها موعظه لينا كلنا عشان نفتكر ان الدنيا فانيه ومش مستهله اننا نتقاتل ونحارب بعض عشانها
جزاكى الله خيرا يا شيماء

mohand said...

السلام عليكم

الدعاء بالرحمة
في القبر

ويوم القيامة ان شاء الله

اللهم تقبل

alwanayoya said...

ياااه شعور صعب

ربنا يتولاها برحمته يارب

بشكرك يا شيماء على اهتمامك بيها

اكيد هيا حسه اللى عملتيه

يارب تكون حساه

تحياتى

MaMaDo said...

انا معرفش شيماء اوى يمكن او هى مره الى دخلت عنها بس كانت من فتره
بس بجد لما عرفت الى حصل زعلت اوى اوى

بس يمكن متأثرت اوى اكتر لما قرأت البوست ده

بجد احساسك واصل اوى فيه
و ربنا يرحمها

Rosa said...

ربنا يرحمها يا رب
ربنا يجازيكي خير على البوست الجميلو ان شاء الله في ميزان حسناتك

مدونـــة الــمــنــبــر said...

الله يرحمها ويغفر لها ولكل اموات المسلمين

ااامين يارب

احساس لسه حى said...

عزيزتى
دايمن لما هنموت هنكون اتاخرنا على حاجات كتير المفروض نعملها لو حتى كلمة اجلناها لبكرة
دايمن بناجل حاجات كتير اوى
ونزعل ناس ونصالح ناس
ونرجع نزعلهم
تغلط ونندم نستغفر ونقول اخر مرة
ونرجع نعدها
ربنا يرحمها ويرحمنا
انا بعدت عن الموضوع باين
سلام

ولــــــــــو said...

اولا ربنا يرحمها ويصبر اهلها
ثانيا انا باشكر ليكي احساسك الطيب
ثالثا للاسف احنا مش قادرين نستوعب لغايه دلوقت يعني ايه حد يبقى موجود لحد قبل تانيه وبعد ثانيه مش يبقى موجود بس سبحان الله هذه هي مشيئه الله لعلها تكون عبره لنا
انا شاكر جدا ليكي وبادعي ان معاناتها تكون ف ميزان حسانتها
اللهم امين

rack-yourminds said...

الف رحمه ليها متعرفيش قد ايه انا اتأثرت بهذا الخبر

الله يرحمها ويدخلها فسيح جناته

يارب ان كانت محسنه فزد من حسناتها

وان كانت مخطئه فتجاوز عن خطئها

تحياتي لكي شيماء

الخيط الرفيع said...

انا كمان الموضوع دا هزني قوي
وعرفتها بعد ما خلاص خلصت وقتها في الحياة
البقاء لله ربنا يرحمها ويكرمها

Hayam said...

ربنا يرحمها
ويغفر لها ولينا
انا ماكنتش اعرفها بس قريت عن الي كتبتوه عنها وقلبي اتقبض وزعلت عليها .. انك تنزل دموع على بني ادم متعرفوش دي حاجة ماكنتش حاسة بيها لغاية اللحظة دي

اسكندراني اوي said...

والله نفس اللي دار في دماغي
هي كانت حتعمل ايه
ومين كان مستنيها
وهي كانت بتفكر في ايه

اللهم ارحمها يارب

hamdool said...

فرصه الكل يقرا الفاتحه على روحها


thanks dear ..




hamdool/ Kuwait

سندباد said...

امر المؤمن كله خير
اذا اصابته سراء شكر فكان خيرا
واذا اصابته ضراء صبر فكان خيرا له

david santos said...

تهاني لعملكم وجيدة الأسبوع

همسات دافئه said...

جزاكم الله خيرا
ان شاء الله ربنا يتقبل دعائنا ليها هى أكيد حاسه بينا
اللهم لا تحرمنا أجرها ولا تفتنا بعدها وأغفر لنا ولها

حنان شلبي said...

عزيزتي واحدة من الناس بصراحة انا ما بعرفها وهي اول مرة ادخل مدونتك من شهرين

بس من قلبي بدعيلها الله يرحمها و يكتبلها الجنة ويآنس وحدتها بالقبر بخير جليس يارب باعمالها الصالحة ويغفرلها ولنا اجمعين

اللهم امين
مدونة الوافي

حسن و حنان