كتير شايفينى غلط لما بأكلم الناس إلي معرفهمش فى الشارع خصوصاً الناس إلي بيعودوا جانبي فى المواصلات رغم إنى بتكلم معاهم فى حاجات عامه مش باحكيلهم عن حياتى الشخصيه ومش بافتكرهم أصلن. بس فى منهم ناس عمري ما هانساهم ذى بنت كده مرة قاعدت جانبها وأنا راجعا من الكلية .أنا قولت لنفسى مش هاتكلميها وبصراحة كنت تعبانة وهى شكلها مكانش مشجع.
المهم البنت دى طلعت صورة فوتغرافية 4×6 وأعدت مبحلقة فيها وقت طويل مكانش عندي الفضول إلي يخليني أعوز أعرف دى صورة مين عاملت مش واخدة بالى وبصيت الناحية التانية لقيتها بتقولي:
"لو سمحتِ معاكي مرايا"
ابتسامتلها وإدتها المرايا ولقتها مسكت المرايا فى إيد والصورة فى إيد ونظرة هنا ونظرة هنا بصراحة شدتني, شكيت فيها, وحسيت إن فيها حاجة غلط بس بردة أعدت أقول "اسكت يالساني خليك حصانى"وبعدين هى إلى اتكلمت وقالتلي
"لو سمحتِ هى دة (وتشاور على وشها) هى دة (وتشاور على الصورة)"
بس كده الصورة وضحت. دة فعلن مش طبيعيه لإن الصورة كانت صورتها فعلن أعدت أفكر أقولها ايه لأنها كانت مستنيه منى أى رد غير" آه" قولتلها
"المصوراتى هوه إلى غلطان كان المفروض يزود الإضاءه ويجيبك, يمين شويه, ومكانش المفروض يلون عينيكى". طلعتلها العجب فى الصورة وشويه شويه كنت هاحكم على المصوراتى بالإعدام شنقاً حتى الموت وسبحان الله البنت ارتحتلى وقلبها اتفتحلى اتبسطت أوى إن إلى فى الصورة دة مش شابها مع انها كانت هى.
وسيبنا الصورة والمرايا والمصوراتى الغلبان إلى أنا بهدلتوه ده وأنا لسه على مبدأى بس لقيتها لوحدها بتحكيلى عن حياتها وأد ايه اخواتها مش بيتكلموا معاها ومامتها سايباها وهى خجوله جداً ونفسها تتعامل مع زميلها بس مش بتعرف.
بصراحه صعبت عليه وأعدت أقولها كلمتين علم النفس إلى بقراهم دول وعلقت على جملتين "حاولى-لازم تبقى أقوى" والحظ بيلعب هنا دوره الطريق كان زحمه والسكة واقفة وفضلت أسمع فى مأساتها وقت طويل
وقبل ما أنزل لقتها بتسألنى
"انتى فى سنة كام؟"
قولتلها ثالثة وياريتنى ما قولتها. عينها اتفتحت متر ورجعت لوا من الصدمه ووشها احمر وقالت بصوت عالى فرجت عليه أُمة لا إله إلا الله
ثالثة ...ثالثة... يعنى انتى أصغر منى وسايبانى أحكيلك وأشكيلك وعماله تنصحينى وتكلمينى وتطلعى فى الآخر أصغر منى
على جنب لو سمحت وروحت نطًّه من قدامها
أجمل حاجة إن الفلم إلى عملته ده عشان هى أكبر منى بسنه واحدة بس برده أنا قدرت ظروفها أكيد مش لاقيه فعلن حد تتكلم معاه ويوم ما لقيت يطلع....أصغر منها....
11 comments:
هههههههه ... انتى مش أول واحدة تشتكى من الحكاية دى و مش عارفة الناس ليه مش بترضى تاخد النصيحة من حد أصغر منها .. تحسى انها بتصعق و يالهوى انا هآخد النصيحة من حد أصغر منى .. يا سلام .. ابقى شوفى بقى ياللى مش عاجبك نصيحة الأصغر منك مين هيبقى ياخد رأيك
انا مبرجحش حكاية انك تتكلمى مع اى حد دى
مبتبقاش لذيذة
خصوصا ان فى ناس بتعتبرها قلة ادب
احنا فى مجتمع ولازم نحافظ على السياق الاجتماعى اللى عايششين فيه
والله انا كمان بحب أتكلم مع الناس اللي جنبي جدا ، أغلبهم بيبقوا شخصيات مثيرة ان الواحد يكلمها
لكن بتكسف أبدأ بالكلام الا لو في مناسبة
موضوع بقى النصيحة اللي تتاخد من حد أصغر، واضح ان البنت حالتها النفسية مش كويسة وكانت هتتعصب في الاخر على اي حاجة
بصى العيب عادة بيكون فى اسلوب النصيحة
عامة بوست جميل
النماذج بتصعب جدا عليا ........ظروفهم ..مشاكلهم همومهم احلامهم ...والواحد بيقول الحمدلله على اللي هو فيه ...في ناس ظروفها اسوء ..بس مش بتظهر المشاكل دي بسهولة
ههههههههههههههههههههههههه على فكرة بيحصل كتير الموضوع دا وخاصة فى المذاكره ممكن تفضلى تدى نصايح للناس فى المذاكرة وتفاجئ انها اكبر منك ههههههههههههههههههههههههههههههه
بس انا مش مع موضوع انك تكلمى كل الناس دى امسكى نفسك شويه
هههههههههههههه دى البنت طلعت سايكو فعلا
بصراحه يعن موضوع انك تكلمى اى حد كدا مش تمام ويمكن ناس كتير تأخده بمفهوم وحش
بصراحه انا لو قاعده فى مواصلات وبنت كلمتنى بفضل اقول هاتى من الاخر عاوزه ايه منى بتلمينى ليه وافضل أأنب نفسى انى قعدت جنب البنت دى وأقول يارب اوصل بسرعه وافضل اكلم نفسى كدا لحد ما انزل واقول الشهاده انى نزلت وماعملتش فيا حاجه
ده بالنسبالك
اما بالنسبه للبنوته اللى جنبك .. بصراحه باب اولى انها تكلم والدتها وتقولها انتى مش بتقعدى معايا ليه ؟ انا كبرت ومحتاجه ليكى تكلمينى واشكيلك وتدينى خبرتك فى الحياه؟
مش دايما الناس حتطلع زيك وتنصح لوجه الله
بصراحة واضح انه كان يوم مثير فعلا
والبنت دى طبعا كانت محتاجة كورس تنمية بشرية
يعنى لو كل يوم تلاقى واحدة زى حضرتك تقولها كلمتين كدة ممكن تتغير
لكن الشخصية دى لما بشوفها بصراحة على الرغم انها بتصعب عليا , لكن مش بتعجبنى اولا لأنها متشائمة وثانيا بتلاقيها مهتمة قوى برأى الناس فيها وانها مش بتحب تكون فى موضع المتلقية للنصيحة
وطبعا الدكتور على جمعة بيقول (النصيحة مُرة فلا تزيدها مرارة) لكن مش كل النصايح مُرة
واهم حاجة ان اسلوبك معاها كان جميل وربنا يهدى الجميع
lol, funny story, the woman is crazy but u know wut, she's the kind who attend to be rude, and if u took it , it will appear thats she's the sweetest heart, hmmmm how do i explain, those kind of people atracts u 1st (the pic) then push u away. then asks for a lil help,(mirrir)reflection of who they really r, and then open their heart for a while, the sweet disscussion about the camera guy ( the fixed pic u give the reader) finally she know u r just traffic ride friend and soon to leave, so again she push u away, but if u stayed, this woman is helpless in fighting and thats the strongest thing she can do, she doesnt have any friends coz when she's attacked she cant attack back. or thats wut i saw through ur story. blessed, thx again very exciting stuff
whiskey puzzler
طبيب نفسانى حضرتك؟ ايه الدقه والتحليل ده كله بس انا محستش انها مجنونه هى بس ظروفها صعبه
Post a Comment