عارفه انى اتأخرت ومرسى على سؤالكم بس مش عارفه ليه مش عارفه أكتب حاجه المهم يعنى قلت أجاوب على تاجات هم تقريبا سبعه جبت اتنين وهاكمل انشاء الله أول واحد بتاع أيات والتانى بتاع محمد المصرى
هل كنت طالب شاطر فى المدرسة ؟
شاطر؟لاء انا كنت شاطره لاء كنت متفوقه وبطلع من الأوائل وكده لحد ما دخلت الجامعه وانحرفتJ
ايه كانت احب مادة و اكره مادة ليك فى المدرسة و الكلية؟
فى المدرسه كنت بحب الرسم واللغات والجيولوجيا وعلم النفس وبكره الكيمياء والفزياء وكنت أدبى عشان كده
الكليه بقى النمره غلط لأنى مبدرسش غير ماده واحده وبصراحه باحبها أصل انا وكليتى واخدين بعض عن حب
كنت عايز تتطلع ايه وأنت صغير ؟
وانا بتاعت ابتدائى كده كنت عايزه أطلع فنانه وافتح أتيليه وكده ولما كبرت شويه كنت عايزه أكون ويتر فى كافى (طموحه من صغرى) وبعدين مذيعه وبعدين مرشده سياحيه وبعدين صاحبه شركه وبعدين واخده جايزه نوبل(فى ايه معرفش)وما زالت الأحلام مستمره
********************
اسم مدونتك؟
واحده من الناس
لماذا اخترته..وماهي نيتك من وراء اختياره؟
بصراحه مفكرتش كتير فى الإسم بس حاسيت انى بنت عاديه بس بتعرف شويه تخرج الى جواها ويمكن أغيره مش عارفه لسه
هل فكرت في إغلاق مدونتك؟..والسبب؟
لاء خالص مهما حصل أقفلها ليه وابطل أكتب ليه لاء مظنش انه هايحصل
صورتك في المدونة..رمزيتها؟
آه أهى الصوره ده بحس انها انا بنت لبسه أبيض وقاعده لوحدها بس بتبص قدامها ومبتسمه مستنيه حاجه حلوه أكيد هاتيجى عندها أمل فى المستقبل
لماذا دخلت عالم التدوين من الاساس؟
لأنى حسيت ان فيه حاجات كتير عايزه اقولها واخلى الناس تعرفها او حاجات عايزه اعرف رأى الناس فيها أو أحس بتواصل مع الناس فى الحاجات الى بحس بيها وطبعا لقيته عالم رائع استمتعت بيه جدا والبركه فى أيات تعبت معايا كتير عشان تدخلنى
احلى جمله قيلت لك فى وصف مدونتك؟
كل حرف اتقال عزيز عليه جدا بجد مش هاقدر أحدد بس يمكن اول واحد كان له طابع مختلف كان بتاع محمد الراقص مع الذئاب وكان
السلام عليكم بقولك ايه من غير مجاملة او مداهنة اجمل مدونة شفتها منذ فترة بجد اسمحي لي في إضافة مدونتك الي مفضلتي فهي تستحق
التعليقات بالنسبه لك ..اهميتها؟
بحس ان فى حد سمعنى بيئيدنى أو بينتقدنى أكيد حاجه مهمه انا الحاجات الى بكتبها عشان اكلم نفسى فيها مش بنشرها
مااحلى بوست كتبته ...ضع اللينك ..ثم اذكر لماذا؟
مش هاعرف أقول أحلى واحد بس هاقول أول أحلى واحد كان يارب ييجى انا بحبه قوى
أحلى مدونة قريتها؟
مدونه واحده؟لاء صعب يمكن المفضلات عندى الى حطه لينكاتهم
حد قل ادبه في
التعليق؟عملت ايه؟
ولا حاجه ممسحتش غير كومنت واحد زمان ومكنش قليل الأدب بس كان اسلوبه سخيف
ايه اللي حيصل لإيميلك لما تموت ؟
هايموت معايا أصلى مفتكرش ان حد هايورثه يعنى
اديت الباسوورد لحد قبل كده ؟
آه أختى
اسمك؟
شيماء
اسم الدلع المشهور وسط أصحابي؟
كتير كل واحد بيدلعنى بطريقته بس الأغلب شيمو ومشمشه وشوشو
مجال دراستك؟
لغات
شخصيتك نوعها ايه؟
مبحبش النكد بس سعات بتنكد مكدبش عليكوا, حالمه جدا, متفائله, عندى امل كبيير ان الى جاى أحلى, بحاول أطور نفسى وأكون أحسن مممم والباقى استشفوه من كلامى بحب أخرج وأشوف ناس جديده مبحبش أتعامل مع الآلآت
بتعمل ايه في وقت فراغك؟
بخرج أو بقرأ أو الكمبيوتر أو كتير بسرح أو بدور على حاجه أعملها:)
السفر بالنسبة لك؟
ياه دا أكبر حلم ليه دلوقتى نفسى ألف العالم
الأكلة المفضلة؟
الأكل الإيطالى بكل أنواعه والحلويات الشرقيه وكشرى ماما
الصفات اللي اخدتها من بابا؟
تفكيره المنطقى
الصفات اللي خدتها من ماما؟
رومانسيتها
أكتر 6حاجات بتكرها؟
الكدب
الظلم
الإستغلال
النكد
الإستسلام
الضعف
اكتر 6 حاجات بحبها؟
ابتسامه الأطفال
مكتبى
الشروق
صندوق الذكريات بتاعى
ألبوم صورى وانا صغيره
الورد
الشغل بالنسبة لك ؟
كيان وتحقيق للذات وتحمل مسئوليه واعتماد على النفس
ايه الكمبيوتر والنت بالنسبة لك؟
وسيله لحاجات كتير علميه واجتماعيه
تمرريه لمييين؟
فى ناس اساسيه ذى ايات عشان ترحمنى شويه
ومهند عشان ميردش عليه
وسليم عشان يركنه لحد ما انساه
وناس جديده
واحد
شمعه أمل
حدوته
ميدو
ممكن
انكسارات
حاتم
غازى
23 comments:
السلام عليكم
يعنى اول واحدة ايه ياربى الهنا اللى انا فيه دا
ازيك لعلك بخير ان شاء الله
اجاباتك حسستنى انى شيفاكى وقاعدة بتحكى معايا
اسلوبك بسيط اوى ماشاء الله
اجاباتك جميله ومنطقيه كمان ... ممكن تقوليلي ايه هو المنطق هههه!؟
سلامااات يا شيمو
اجابات جميلة ورزينة
ربنا يكرمك ويوفقك
بس فيه حاجة
واصلي احلامك واحلمي حتى لو بويتر في كافيه اياكي تستسلمي
كمان ادعيلي
تحياتي لك من ماناساس البلد
اجاباتك جميلة اوى يا شيمو
وبجد بتدل على انك رومانسيه اوى
طبعا مش هنسى انى اشكرك عل التدبيسه الجامده بتاعت التاج دى
تحياتى يا جميل
على فكره شخصيتك متواضعه جدا وجميله جدا ورقيقه جدا وكل الصفات الحلوه اللي ف الدنيا
وبالنسبه ليا ولكل اللي بيتابعوا مدونتك انتي مش مجرد واحده من الناس انتي من احسن الناس
تحياتي
اه صحيح
هو حاتم ده انا؟؟؟؟
السلام عليكم
اجابات جميله
ومش هجاوب علي البوست
رينا
:))))
أولا وحشتينى ثانيا الهنا هو الى انا فيه
مرسى ياجميله u r so cute
************
واحد
المنطق مممم هو اجاباتى:)
مرسى ياواحد مستنيه ردك عليه
************
the groom
ياأهلا ده أول مره ربنا يكرمك انت كمان أسعدنى وجودك حقا وياريت دايما تشرفنى:)
شمعتى الغاليه
العفو على ايه أى خدمه هههه
أشكرك على كلماتك الى بتنور بلوجى ياشمعه:)))
**************
ولو
حضرتك بتكلمنى انا؟
ربنا يخليك بس ده كتير عليه قوى
أمال يعنى حاتم مين هو انا عندى كام حاتم؟ أشكرك على كلماتك اللطيفه وأشوف ردك قريب ان شاء الله
**************
أستاذ مهند
حد قال لحضرتك ولا بلغ سعاتك انى مستنيه ردك انا قلت انى بعتاه عشان متردش عليه نقرأ كويس قبل ما نعلق ياريت
سلام
السلام عليكم ورحمة الله وبركاته
ما شاء الله اجاباتك جميله جدا
وعجبتنى اوى
مشمش .. إجابتك حلوة .. و حلو التدرج غى أحلام ااشغل دى .. على فكرة أنا لسة عندى حلم إنى أفتح محل حلويات و لما ربنا يكرمنى يقلب كافيه .. حضرتك أساسى هتكونى معايا ناتى و دينا .. و ممكن نجيب هبة علشان تجارة .. و نجيب ريناد علشان دارسة إعلام .. و نجيب صحابنا علشان نبقى مآمنين لبعض :)
آآآآآآآه و قد جاء يوم الحساب و اديكى تانى بعتيلى تاجات ..أوكش .. ماشى يا جميل
شيماء
السام عليكم ورحمة الله وبركاته
بسيطة جدا اجاباتك .. وجميلة
انا عايو اطلب منك طلب صغبر قد كدهوه
ممكن ؟؟
بس دا سيكريت
ياريت أعرف إيميلك
ويا ريت توافقى
******
أنا متشكر جدا على تمريرك التاج ليا
انا بموووووت فى التاجات
وهارد عليه
دا اول تاج يتمرر لى فى حياتى
******
يا ريت ماتنسيش موضع إيميلك
سلام
هي بعينها شيماء والله
إجاباتك بتدل عليكي وعلى الشخصية اللى كونتها عنك من البوستات إللى قرأتهالك
الحمد لله ليا الشرف اني اتابعها من بدايتها تقريبا
ما علينا ...
إجاباتك كلها جميلة وصريحة
عجبنى قوي طموحك من وانتى صغيرة
دايما بتتمنى التألق وانك تكوني كويسة جدا
اما الإنحراف في الجامعة
ههههه
كلنا هذا الرجل يا فندم :D
الواحد مبقاش فى دماغه الدح زي الأول برضه
كل سن وله حكمه بقة :)
وللأسف كلامك صحيح
انا هركنه غالبا
لسبب بسيط هو انى لسة رادد على تاجك القديم قريب جدا
لازم دة يقعد يشرف عندي شوية وبعدين ابقى ارد عليه
اصل شرف ليا والله اني يبقى عندي تاج جاي من عند شيماء
تحياتى تحياتى تحياتى
السلام عليكم
التاج جميل يا شيماء
وخليتي وشي يحمر واتكسف وابقي عامل زي البنت اللي جلها عريس لما لقيت اسمي في التاج
علي فكرة انا فاكر انا كتبت الرد دا ومدونتك كان فيها موضوعين بس...لسا علي المحارة يعني
كنت سعتها بتفسح في المدونات وكنت وقعت كدا فكام مدونة صحابهم عاوزين قطم رقابيهم
واشتغلت في مواضيع ضد التيار بعدها علي طول
كانت بداية جميلة وخفيفة ورقيقة لميلاد مدونتك يا شيماء
وتالت موضوع بقي اتخنقنا مع بعض...وقطعنا شعر بعض...وكنت هجيب الرجالة ونيجي نكسر المدونة بتاعتك واقطع لقمة عيشك من التدوين...بس ربنا سترها
متصدقنيش انا فنجري بق وبتاع كلام ومبعرفش اعمل حاجة
وبقت واحدة من الناس من المدونات بتعتي اللي ميعديش عليا يوم غير لما افتحها فيه اكتر من مرة واقرأ كل حرف فيها
الكلام دا ليكي ولكل مدونة محترمة افخر اني اشترك في الردود فيها
دمتي في خير اختي الكريمة
وعندك احلى بوكيه ورد يكون فيه الوان ابيض وبمبى وبنفسج للقمر شيمو على اجابات متوقعة لشخصية هايلة رومانسية
تحياتى ومتغيبيش كتير لو سمحتى يا مرهفة الحس -- ممكن اجى اشرب كابتشينو فى الكوفى بتاعك؟؟ ممكن ولا هنبقى بخلاء بقى
سلامى -- هبة
فداء الإسلام
الله اسم مدونتك تحفه
مرسى على زيارتك اللطيفه ده ياريت تتكرر:)
*************
أياااات
وحشتينييييي
طب قشطه انتى كده رتبتى كل حاجه ناقص بس مهندس ديكور وحاجاه بسيطه وتافهه قوى حد ينتحر ويجرب يدخله ههههههه
*************
غازى
وعليكم السلام
كل ده اسرار لاء متخفش محدش سمع حاجه سرك فى ميكرفون ششششششش
مرسى قوى مستنيه ردك عليه
shaymaa.hassan@gmail.com
سلام:)
سليـــــــــم
هههههههههه
والله بتحرجنى
أيوه هى بعينها محدش غيرها:))
دا انت كنت من اول حاجه معايا يارب دايما
طبعا كلنا انحرفنا فى الجامعه بس مش أخلاقيا والله هههههه
انا لسه بطلع اول واحده برضه بس بعد الخط الأحمر أحيلك بقى حكايه الخط ده أصل انا فى الجامعه بيدرسلى أجانب فمشيين كده مع نفسهم بنطام غريب كل ما يعملولنا كويز تلاقيهم مسكوا درجاتنا من الأعلى للأقل وكتبوهم فى ورقه بالأزرق ويحسبه المتوسط وشدوا خط أحمر ههههه أهو انا بقى اول واحده بعد المتوسط
ياسيدى رد براحتك انا فى انتظارك ويسعدنى تواصلك الدائم معايا طولت عليك معلش:)
محمد
ههههههههه
يعينى كل ده حصلك:( بس احسن ما انت ياما أحرجتنى
وبعدين آه فعلن ذى ما انت صاحب اول أحلى تعليق كنت برضه صاحب اول خناقه دايما كده سباق بالخير :))))
طبعا سندتنى كتير فى اول حياتى التدوينيه ولقيتك بتبعت لينكاتى للناس وحاجات كده ربنا يخليك وتدوم زياراتك اللطيفه لبلوجى الذى يسعد بك دائما
تحياتى ياعزيزى:)
**************
دوبااااااا
ايه القمرالى بينور بلوجى ده ربنا يخليكى والورد كله وصلنى ياحبيبتى انتى الكافى وصاحبه الكافى تحت امرك بس مش انا صاحبته انا بس ويتر هههه تصدقى فكره ما افتح كافى بنفسى يالا هى الأحلام بفلوس
أسعدنى وجودك ياغاليه:)
يسرني ان اتقدم بخالص التهاني وأطيب التمنيات
لكم والأسرة الكريمة والأصدقاء
بمناسبة حلول شهر رمضان المبارك ،
أعاده الله علينا وعليكم وعلى مصرنا الحبيبة
بالخير واليمن والبركات
تقبل الله وكل عام وانتم بخير
يا ترى كنت غايبه ليه
ربنا يوفقك
مستنى زياره منك
ابتسامه الأطفال
مكتبى
الشروق
صندوق الذكريات بتاعى
ألبوم صورى وانا صغيره
الورد
.......
كلها اشياء تستحق الحب
اكرمك الله
***
هو انكسارات اللى انتى مرراله التاج ده يبقى انا؟؟؟
...
تحياتى
كل عام وأنتم بخير
يهل رمضان من بعيد
حاملاً لي أحلى الذكريات دائماً
أصدق العبرات حتماً
أخلص العبادات دوماً
لرمضان عندي مكانة خاصة
ولكم أنتم أيضاً
يا أحبابـــي
فكل عام وأنتم بخير
وأنتم إلى الله أقرب وعلى طاعته أدوم
يامصر امتب ابيك رسائلى
يارب أمين أشكرك جدا وجزاك الله خيرا
***********
حزين
يعنى حاله من التشتت بس هاتعدى انشاء الله
**********
انكسارات
اكيد يعنى هو انا عندى كام انكسارات:)
مستنيه اجابتك عليه وشكرا على زيارتك
**********
صاحب البوابه
وانت بخير وسلام يارب
ربنا يكرمك ومتشكره قوى
السلام عليكم
التاج جميل
والاجابات اجمل واحلى
اسلوبك جميل اوى
السهل الممتنع
بتمنالك التوفيق اكتر واكتر ويارب فجديد دايما
تحياتى
Post a Comment