المشهد الأول
انا قاعده على السفره وفرشه الورق حوالايا وماما واقفه على بعد بتلمع جزمتها
ماما:الله يرحمك ياحمد يابن عمى عمرى ما شفته الا وكانت جزمته بتبرق كأنه كل يوم بيجيب واحده جديده
أنا:الله يرحمه
****************
المشهد التانى
كلنا قاعدين بنتغدا مع بعض وبابا رايق شويتين وعمال يقول نكت وماما كالعاده مش بتضحك
بابا:الله يرحمك ياخالتى هى الوحيده الى كانت بتضحك على نكتى البايخه
أنا::)الله يرحمها
***************
المشهد التالت
فى محاضره الترجمه
الدكتور:.......ونفس الإعتقاد عند اليابانين لما البنت تنجح وتروح تقول لمامتها كان نفسى بابا يكون معايا فى الوقت ده الأم ترد تقولها هو أكيد حاسس بيكى وفرحان معانا كمان نفس الرد الى بترده الأم المصريه
انا:يعنى هو ده مش حقيقى
الدكتور:لأء طبعا هو فى عالم واحنا فى عالم تانى خاااالص
انا: يعنى مفيش صله بين العالمين دول؟
الدكتور لأء ياشيماء مفيش دا مات يعنى لا احنا هنحس بيه ولا هو هيحس بينا
انا:طيب ما احنا عندنا فى الدين لو انت زرت حد متوفى وسلمت عليه بيرد عليك السلام وبيأنس بوجودك وبيكون عارف انت مين وفى كمان حديث عن الرسول صلى الله عليه وسلم فيما معناه يعنى انك لما تحجله او تقراله قرآن او تدعيله الثواب بيوصله والميت بيلاقى رحمات بتنزل عليه فبيسأل الملايكه جات منين بيقولوله من فلان
الدكتور:ممممممم ايوه بس اكيد مش عارف مين نجح ومين اتجوز ومين مات ومين لسه عايش
انا:امال ليه لما الواحد بيكون فى كرب عظيم بيقول انه بيشوف اهله الى ماتوا بيزروه فى المنام ويخففوا عنه؟
ايمان:أيوه مظبوط انا اختى لما خلفت كان ابنها عنده مرض خطير فى القلب وكانت دايما بتقول انها حاسه بخالى الله يرحمه وهو بيقولها متخافيش عمر هايجى معايا هيكون معايا متقلقيش رغم انها كانت كارهه انها تسمع الصوت ده بس كانت دايما بتحس بيه وابنها مات فعلن وهو فى العمليه
فى بلوج محمد الراقص مع الذئاب الجمله ده مكتوبه إذا كان هناك شخص اتمني ان اكون في مثل شخصيته فسيكون سيدنا عمر رضي الله عنه حتي اني رأيته يوماً في منامي وانا أسقيه لبن دا حتى الناس الى ماتوا من زمان بيكونوا حاسين بمين الى بيحبوهم اوى وبيزوهم
.
.
ها
يبقى فيه صله ولا اتقطعت؟؟
20 comments:
السلام عليكم
طبعا انا مؤمن ان فيه صلة
بس حسب العمل والرضا
والله اعلم
ساعات بيحسوا بينا و ساعات لأ ... بس يعنى حتى لو مش بيحسوا بينا على طول خلينا احنا على طول فاكرينهم و نترحم عليهم
عايزة حاجة لتأكيد إنهم بيحسوا بينا .. مش فاكرة القصة كانت بالظبط لمين من الصحابة كان اتفق مع حد ان اللى يموت الأول يروح للتانى فى المنام يقوله إيه اللى حصل .. المهم واحد مات و التانى فضل يستناه كل يوم و هو ما بيجيش و مرت سنين فى الآخر طلعله فى الحلم .. قاله كل ده انت ماجتش على طول ليه ؟ .. قاله كنت باتحاسب
طبعا غباء منى إنى مش فاكرة الأسامى .. اللى يفتكر ياريت يقولى
اكيد
بس مش متاحة لكل البشر
اللي ماديتهم مشوشة على إحساسهم بالروح
لك تحيتي
أكيد في صلة يا شيماء
عالم الروح اعقد من ان يوصف او يقطع احدهم فيه برأي ملزم..!!
علي فكرة
الجملة دي
"لم أزل أعزف ألحانى وأشدو للحياه واذا ما مات بقلبى أمل...جد سواه.."
عجباني قوي
(:
تسلم ايدك
ودمت بخير
hey:
this is my new blog address
http://egyptiangirl-81.blogspot.com
hope 2 see u there
chao
الفكر كلها روعه بالمشاهد الثلاثه علشان توصلينا للسوال فى صله ولا لا
انا افتكرت الحديث بتاع الرسول وانتى بتقولى الرحمات وقراءه القران انى بينقطع العم الا من ثلاث احدهم ولدا يدعو له ده بخصوص الدعوات
بخصوص احساسهم بينا و ما يحدث من حولنا انا مش عارف
السلام عليكم
والله يا شيماء الموضوع ده اختلفت عليه الآراء ولو أنى من مناصري رأيك
انا لى تجربة شخصية فى هذا المضمار(طبعا لم تحدث معى ولكن حدثت مع عمى رحمه الله) وهى تجربة غريبة جدا ، ولم لم أكن حاضرا لما صدقتها ابدا
بداية الموضوع انى قد قرأت فى أحد كتب الكاتب راجى عنايت (سلسلة كتب حقائق أغرب من الخيال) فى كتاب لا اذكر عنوانه الان ولو انى اعتقد ان عنوانه هو العائدون من الموت
هذا الكتاب كان يتكلم عن حوادث حدثت لبعض الأشخاص وجعلتهم يموتون لدقائق او لساعات ثم عادوا مرة اخري للحياة
(طبعا لن ادخل فى التفاصيل) ولكنهم اتفقوا جميعا على انه بمجرد خروج روجهم من أجسادهم وجدوا انفسهم ينزلقون فى نفق مظلم طويل مخيف وفى نهايته تواجهوا مع كائن نورانى لا تستطيع الكلمات أن تصفه وقالوا أنه أثناء وقوفهم مع أمام هذا الكائن ، شاهدوا فى عدة ثوانى معدودة شريط حياتهم بالكامل وكأنه فيلم مصور (تخيل مثلا ان تري 60 سنة من حياتك فى ظرف ثانية) وبعد هذا وجدوا أرواحا اخري تذهب لتركب شيئا ما ، ولكن عندما يذهبون لركوب هذا الشيئ يفاجئون بمنعهم من الركوب ، ويظهر فجأة أقرباؤهم الموتى ويسلمون عليهم ثم يخبروهم بأن موعدهم لم يأتى بعد ، وأن عليهم أن يعودوا للحياة مرة أخري وأن يقوموا بكل فعل وعمل صالح تجهزا لموعدهم ونهايتهم
وفجأه يصحو الشخص الميت ليجد نفسه مازال على قيد الحياة (سواء فى غرفة العمليات أو على سرير بيته أو أو أو ، كل على حسب ما حدث معه) المهم حتى لا أطيل عليكم
عمى مرض مرضا شديدا ودخل فى غيبوبة وبعد اسبوع أفاق من الغيبوبة وحكى لنا قصة حلم استمر يتكرر ويتكرر أثناء تلك الفترة
وطبعا صدمت عندما وجدت كلامه يتطابق مع نفس الكلام الذي ذكره الكاتب فى الكتاب
وقد انتهت قصة عمى بأنه عندما وصل لهذا الشيء الذي سيركبونه فى طريقهم لمحطتهم الأخيرة ، جاء له أباه (جدي) وأخبره ان موعده لم يحن بعد ولكنه قريب جدا جدا ، وان عليه أن يلتفت جيدا لدينه وللأعمال الصالحة حتى يغفر له ربه انشاء الله.
المهم بعد ما فاق عمى من الغيبوبة كانت صحته زي الفل وكأنه مكنش عيان ولا مريض ابدا ، وزوجته تفاجأت انه نازل من البيت ، فسألته انت رايح فين؟؟ قلها نا رايح الشغل
وبعدها ب25 يوم توفاه الله بدون أي مرض أو متاعب
مات وهو نائم
وتحققت كلمة جدي التى قالها له أثناء الغيبوبة بأن موعده قريب جدا جدا
طبعا لن يصدق أحد هذه القصة ولكنها حدثت بالفعل أمام العائلة بأكملها
اسف جدا جدا للإطالة واعتذر ان كنت قد دخلت بكم فى موضوع اخر ، ولكن هناك خطوط مشتركة بين الموضوعين ، ولولا أن ما اكتبه هنا هو مجرد تعليق.. لكتبت لكم عن الأمر بشرح مستفيض
دمتم جميعا بخير
اسامة سامى
عارفه
استني
اولا سوري ع التاخير والتقصير
ثانيا: معلش اصلي داخله سخنه
انا بحس ان الانسان مبيموتش غير لما الناس تنساه وتبطل تفتكره
يعني جدتي الله يرحمها ماتت من سنين بس بحسها ويايا دايما ولسه عايشه
لأنها لسه في قلبي وعقلي
كده لما تنسي حد حتى لو عايش يبقى مااات
اما الصله فكلامك صح واللي قولتيه من الناحيه الدينيه صح جدا
بيحسوا وبيعرفوا مين بيقرا ليهم قران ومين بيزورهم
مهند
وعليكم السلام
آه انا برضه بختص الصالحين
والله أعلم طبعا
مرسى يامهند ربنا يكرمك:)
***********
بيقولوا سايكو
أيوى
انا عارفه القصه ده بس برضه مش فاكره اسامى مش مهم اظن فى الأخر انه كان مديون
والله أعلم
نورتينى ياأيات:)
******************
مصطفى
مممممم
ممكن بس انا أكيد قصدت الصالحين ربنا يجعلنا منهم واياكم
ربنا يكرمك يامصطفى مرسى اوى
بتنا القديم
أشكرك جدا على رأيك
والجمله اتفضلها لازم يجد سواه طبعا عشان نعرف نعيش بدل النكد الى بشوفه رايح جاى وانا بتمشى فى البلوجات ده هههههه
أسعدنى وجودك جدا ربنا يديمه ان شاء الله:):)
****************
سولا
أكيييييييد هتسى مى قريب ان شاء الله:)
******************
سيدى الرئيس:)
أشكرك جدا على رأيك
طبعا الله اعلم انا معنديش رأى قاطع بس طالما الثواب الى احنا بنعمله بيوصلهم وطالما بيزورزنا فى منامنا يبقى استنتاجى ان يكون فى صله
انا كمان مش عارفه بس سعيده بزيارتك وياريت تقرا تعليق كلام لوجيك
كلام لوجيك
انا مش قادره اقولك تعليقك أد ايه رائع ومخيف
انا برضه قريت قبل كده عن الواحد الى روحه بتطلع بس بتكون شايفه كل الى حواليها اذكر برضه ان فى واحد كان فى العمليات وبيقول انه كان شايف كل حاجه من سقف الحجره ووصف للدكتور بالظبط هو عمل ايه فى جسمه وقاله انت قلت كذا وكذا وبعدين قعدت على الأرض وانا حاولت اصرخ واقولك انا هنا بس صوتى موصلش لأن جسمى كان قدامك
وبعد ما الدكاتره اجزموا انه مات روحه اتردتله تانى وفاق
سبحان الله
ويسألونك عن الروح قل الروح من أمر ربي وما أوتيتم من العلم إلا قليلا
سوره الإسراء
صدق الله العظيم
مرسى يااسامه جداا ودايما تضفلى بتعليقاتك وتطول ذى ما انت عايز:))
عارفه
استنى
انتى عجبتينى من اول كومنت:)
ومتعتذريش على التأخير ولا حاجه المهم انك تنورينى انا ياستى فى انتظارك
بعكسك بعكسك:):)
ثانيا بالنسبه للى انتى قلتيه عجبنى جدا بالذات لما قلتى لما تنسي حد حتى لو عايش يبقى مااات
صح جدا
عشان لما حد يقولى متقوليش ربنا يخليك عشان ده دعوه مش بتأثر فى شئ بقوله ربنا يخلى سرتك فى الدنيا والناس تكون دايما فاكراك
مرسى ياذمرده:)
فيه اتصال يأذن به الله
انا شخصيا والدى توفى من 7 شهور
بييجى فى الرؤى بأخبار حالية
جالى يدينى مبلغ تقريبا قد 5000 جنيه
فى نفس اليوم جانى المبلغ ده
و كنت مجبس رجلى و فكيت الجبس
جه لأختى و بيقول لى فى الرؤيا
يلا البس الحذاء فردتين بقة
----------
مش كل اللى ماتو ربنا بيعطيهم الفرص دى
هما لهم إذن بانهم ييجو لنا فى المنام
و بعدين دول مطلعين على الغيب
لانهم تحرروا من قيود الدنيا خلاص
فبتظل فيه صلة من خلال الرؤى
و الله أعلم
شكرا لأختنا الكريمة شيماء
على الموضوع الجميل
د.حمـــــاس
انا اكتر واحدة مؤمنة بان فيه صلة ما روح عبد الحليم ملازمانى على طول اهوه زى الى عايش معايا و حاسس بيا امتى فرحانة و امتى زعلانة اكتر من العايشين والله مع انى لا اقربله و لا اعرفه امال باه لو كان اب او شخص قريب ؟
و بعدين انا سمعت احمد عمر هاشم قال ان بيبقى فيه صلة فعلا
موضوعك جميل تحياتى
د حماس
مرسى جدا على تعليقك بجد أفادنى جدا جدا وياريت تسعدنى بزيارتك على طول
**********8
عاليا
:):)
غريبه اوى حكايتك مع عبد الحليم ده
مرسى على وجودك جدا:)
انا طبعا مش هاقول وحشني المرور على البلوج بتاعك اد ايه
وكمان مش هاكذب واقول اني كنت ناوي اعلق على البوست ده
انا لما قريته اول مرة مش عرفت كلام مناسب اعبر بيه عن اللي حسيته لما قريت البوست ومازلت لكن انا كنت جاي اعلق على الفيلم الياباني لكن للاسف مش لقيته فتخيلت لوهلة ان البوست ده كان عند حد تاني بس انا فاكر كويس انه كان عندك
امال راح فين؟
whatever
حاجة اخيرة انتي ليه قفلتي البساط السحري انا عارف ان الناس اللي دخلوا معاكي انشغلوا شوية عنه لكنه ف الاصل بتاعك فياريت لو ظروفك تسمح تبقي تسيبي فيه كل فتره بوست
بجد كان بلوج حلو جدا
انا عارف اني مش قلت حاجه ليها معني بس اهو انا بصراحة وحشني اني اعلق هنا
تحياتي
فى البدايه طبعا انا يشرفنى انى اكتب تعليق فى مدونتك
وطبعا فى صله ومانقطعتشى
وعلى فكره وانا بقرا موضوعك عمال بفتكر مواقف معايه مشابهه بتاكد كلامك
وفى النهايه سلامى وربنا ييوفقك
ولو
حاتم بجد انا الى مشعرفه تعليقك ده يترد عليه يتقال فيه ايه بس
whatever
انا رديت وحكتلك قصه حياتى عندك وان شاء الله لو فتحت البساط يبقى عشانك وقريبا ان شاء الله:)
مرسى اوى
**************
الساحر
انا بجد الى اتشرفت بوجودك وأسعدنى رأيك بس انا كنت عايزه أعرف المواقف الى افتكرتها ياريت تذكرهالى
أسعدنى مرورك جدا بجد:)
مش عارفه يا شيماء
انا بعتقد انه بيحسوا بينا
مش عارفه و مش قادرة افتي
بس جدي الله يرحمه كان بيحبني اوي
و دايما يجيلي في الحلم بيحضني أووووي
الله يرحم موتي المسلمين جميعا
بوستك و موضوعك رائع اوووووي
تسلمي يارب
ربنا يسعد ايامك
:)
والقادم أجمل
:):)
الله يرحمه ويجمعك بيه فى الجنه ان شاء الله ويضمك اوى برضه
عجبنى تعليقك جدا هى ده التعليقات الى كنت مستنياها مرسى اوى
Post a Comment