Monday, February 18, 2008

Happy Feb

بجد أجمل شهور السنه وكل ايامه هابى نبدأ بالأحداث سريعا
10/2 كأس الأمم الأفريقيه
طبعا فرحت ذى كل المصريين رغم انى مليش فى الكوره خالص وأول مره أتفرج على متش بس عندى 3 ملاحظات 1 -لما شوفت التقرير الى اتصور فى بيوت اللاعبين لاحظت ان كلهم ناس بسيطه جدا عمال وفلاحين وده معناه انهم وصلوا للى هم وصلوله ده من غير وسطه ولا امتحانات متفبركه ولا عشان ابن مين ويعرف مين كلهم فعلا كانوا كفء وعندهم اراده وهدف مقعدوش على القهوه يشربوا سجاير ومخدرات ويشتموا فى ام البلد ويقولوا ما هى بايظه بايظه ولو نيلك يامصر صلصه
2- أتمنى ان ذى ما الحكومه والشعب دعمت الناس ده اوى كده تهتم بالمثقفين ربع الإهتمام ده اتمنى بجد ان الأبحاث الى مرميه فى الأدراج لحد ما الفران قربت تاكلها تخرح للنور بدعم وتشجيع ذى ده
3- صحيح اللاعيبه فرضوا على كل العالم احترامهم وكانوا فى منتهى الذوق والشياكه فى التعامل وأجبروا الخصم انه يثقفلهم بس بجد الى حصل عندنا شىء مؤسف ليه الشوارع تتقفل بالشكل ده ليه الناس الى راحت شغلها متعرفش ترجع ليه مش بنعرف نفرح بذوق وشياكه برضه!
*******************
2/14 عيد الحب
الدنيا الى احمرت والورود الى انتشرت والهدايا الى غليت بس ما علينا مش هقول بدعه وغلط ومفروض ومش مفروض بس الفكره بقى ان ليه دايما بنكون محتاجين مناسبه عشان نعبر عن حبنا واى حد بيجبلنا هديه اول سؤال بنرميه فى وشه قبل شكرا حتى (ايه المناسبه؟)يمكن اليوم ده يكون تلكيكه عشان تعبر عن مشاعرك ويمنعك من انك تسأل عن مناسبه
**************
2/16 عيد ميلادى
أكيد أهم يوم فى حياتى وبالذات السنه ده لأنى أكملت 21 عام وأصبحت رشيده ومعترف بيا فى المحافل الدوليه وتعتمد امضتى دلوقتى و بقيت مهمه
*************
2/20

عيد بلوجى

وده تانى أجمل تاريخ فى حياتى وبجد أحلى حاجه حصلتلى السنه ده بقالى معاكم سنه بشارككم مشاكلكم وبنتناقش ونتخانق وضحكت لفرحكم وبكيت لحزنكم حسستونى كتير انى أخت وصديقه وحبيبه وأم وطفله بجد انتم العالم الى اتمنيت انتمى اليه والناس الى على يقين انى مش هلاقى ذييها تانى وتعرفونى أكتر من ناس كتير سمعانى وبتشوفنى كل يوم انا حبيتكم أوى بجد وربنا الى يعلم
شكرا لكل كلمه فى تعليق اتكتبت عندى وشكرا للإحساس الى حسيته من كلامكم وشكرا لصحبت عمرى الى دخلتنى العالم الرائع ده وربنا يقربنا من بعض أكتر وأطفى معاكم شمعتى التانيه لو كان ليا عمر ان شاء الله

21 comments:

AHMED SAMIR said...

اول حد في الكون الاقيه بيحب فبراير
طبعا انتي عارفة ان اسم الشهرة لفبراير هو فقراير
بس انتي مبرراتك كلها قوية
كل فبراير وانتي طيبة ان شاء الله

و القادم....أجمل said...

السلام عليكم

أولا وحشتينا
ثانيا انا ثاني رد
:D
أتمني يعني
:\

ثالثايتفرع إلي

أولا الكورة بجد فرحتنا اوي
و زي مقولتي ان اللعيبة وصلوا و كلهم من بيئات بسيطة و للأسف فيه كتير نفسه في تمن فرصة اللاعبين دول
و الاهتمام اللي نالوه
بس انا عجبني كلامك علي الناس اللي
كل شوية تشتم في مصر
بجد بضايق اووووووووووووي
ربنا يوفقك يارب و ييسر لك أمرك

ثانيا
حكاية الفالانتين دي
انا مش بعترف بيها
بحس انه لو اي حد جابلي اي حاجة في اي يوم بس حسيت بمشاعرة الطيبة سواء اختي امي صديقتي زوجي اخي اي حد هحس انه عيد مش عارفه ليه نفس الشعور يمكن هيتضاعف لو في يوم غير المدعو فالانتين دا
:\


ثالثا
كل سنة و إنتي طيبة
و سعيدة
و متفوقة
و مرتاحة البال
و سعيدة الحظ
ياااااارب
هابي بيرث دي
:)

رابعا
كل سنة و البلوجاية منوراني
كل سنة و هي رقيقة زي صاحبتها

كل سنة وإنتي همساتنا الدافئة
:)

Doba said...

هابى بيرث داى تو يو مدونة حلوة
سنة حلوة يا جميل

عجبتنى قوى البيضتين اللى ماسكين فى ايد بعض وخايفين على بعض

صورة معبرة قوى
تحياتى
هبة

Anonymous said...

اهلا
فينك من زمان

كل لحظة
كل بوست
كل حب

وانتي طيبة

mohamed emera said...

السلام عليكم
كل سنه وانتى طيبه دايما واقرب لله
وعقبال مثلا 9547863 سنه
ويارب فعلا نعرف نفرح صح حتى الفرحة غلط
بس بردة فيه امل طالما حد زى حضرتك شايف الغلط دى اول خطوة نشوف غلطنا
واكيد هنبقى احسن ان شاء الله
اول مرة اقول بس البوست دا هو اللى شجعنى تحياتى لابو تريكه وربنا يجازيه خير
اسالك الدعاء لغزة
تحياتى للبوست الرائع
وكل سنه وانتى طيبه
اشوفك بين حروفك

همسات دافئه said...

a.samir
مرسى يافندم نورتنى وضيف اليهم ان اول زياره ليك ليا فى فبراير أهو مبرر قوى كمان اهو:):)
وانت طيب ان شاء الله:)

************
والقادم أجمل
وعليكم السلام
اولا بجد ياصحبتى المتفائله انتى كمان وحشتينى معلش ظروف الحياه بقى وكده
ثانيا انا كمان مش معترفه بعيد الحب ده بس كتير بلاقى صحابى يكونوا عايزين يشتروا هديه لمامتهم يقولوا طب نستنى عيد الأم مش عارفه ليه دايما الهدايا مرتبطه بالمناسبات..بس:)
ثالثا وانتى طيبه ربنا يخليكى ليا ياقمر ويديم تعليقاتك عندى:)

همسات دافئه said...

doba
وانتى طيبه مرسى اوى اوى
وشوفتى البيضتين انا بطلت أعمل بيض اومليت من ساعت ما شوفت الصوره هههه
الحمد لله انها عجبتك
نورتينى:)

***********
مصطفى باشا
معلش ظروف غصب عنى
ربنا يخليك يامصطفى وانت طيب وبخير يارب:):)

***********
محمد
وانت طيب:):)
وطبعا فى أمل انا لا أيئس ولما الاقى الأفكار بتتغير بقول ان اكيد الأفعال كمان مسرها تتغير أشكرك يامحمد اوى:):)

(احمد سكر ) said...

كل سنه وانتى طيبه يا شيماء
فعلا شهر جميل
بيفكرنا بشهر فبراير 2006
كان بردو عيد حب
وكاس امم
وكان فيه ذكرى جميله ليا بردو

اممممممم
شيمو
بجد بجد

مدونتك راااائعه

تقبلى تحياتى
احمد سكر

Known as PHYSCO said...

مشمشة .. أخيرا كتبتى ... البلوج بتاعك كان وحشنى يا بنتى .. ناخد نقطة نقطة من اللى انتى قلتيهم

أولا فوز مصر بكاس افريقيا خلانى فرحانة جدا رغم إنى فعلا بطيخة فى الكورة .. بس كنت فرحانة أوى .. و بما انك جبتى سيرة الشوارع المقفولة فابن ابن خالتى حصلت له حادثة فى اليوم ده بعد الماتش على طول ما عرفوش يروحوا المستشفى غير على الفجر .. حسبى الله و نعم الوكيل

تانى حاجة .. يوم الأخ فالنتاين .. بصى أنا مقتنعة انه يبقى فيه يوم الواحد يعبر فيه عن مشاعره .. لإن الدنيا بتاخد الواحد أوى و بتنسيه ساعات الناس اللى بيحبهم.. فاليوم ده بيبقى فرصة علشان يبقى يوم مثالى عشان نفتكر الناس ولو بمسج

تالت حاجة .. كل سنة و انتى بألف صحة و يارب اللى جاى يكون أحسن من اللى راح .. و طبعا ده لازم يكون أحلى عيد ميلاد .. انا وا نتى عارفين ليه :)

و كل سنةو انت طيب يا أحلى بلوج و يارب ما تشتهر كده و يكتبوا عنك فى الدستور و تتجاب فى العاشرة مساءا :) .. و أحرجتينى .. يا كزوفى

ما تغيبيش كده تانى

الآء said...

عجبني قوي البلوج بتاعك
فعلا كلنا فرحنا لفوز مصر وتتخيليش اد ايه

وبالنسبه ليوم الفالنتين عاوزه اقوللك اني بتفقع منه وببقي متغاظه لاني بلاقي كل الناس ماشيه بهدايا حمراء وورو وانا اليوم بيعدي عليا عادي جدا هههههههههه
انتي عارفه الحقد بقا هههههه
********
بس علي العموم انا شايفه ان الحب مالوش عيد ومالوش يوم ولا وقت محدد
لان هوا الحب كده وهوا اللي بيفرض علينا نفسه مش أحنا اللي بنفرض عليه نفسنا
*****

وكل سنه وانتي بألف صحه وسلام وكل سنه وانتي طيبه وعقبال ال 100000000 سنه
وتكوني لسه محتفظه بشبابك مش عارفه ازاي ؟؟؟؟
*****
وطبعا دا عيدنا احنا ان البلوج بتاعك يبقي بقاله سنه وان شاء الله متحرميناش منك خالص

تحياتي لك

قلب ينبض لله said...

عندك حق ف انك تقولي علي شهر فبراير انه شهر هابي

كل سنه وانتي طيبه وبصحه وخير وسلامه بمناسبه عيد ميلادك ولو انها متأخرة شويه

وكل سنه والبلوج بتاعك أحلي وأجمل

تحياتي ليكي

مدحت محمد said...

كل سنة وانتى طيبة ويارب السنة دى تكون سنة سعيدة عليكى برضه
ونشوفلك مواضيع جميلة وجديدة
ويجعل كل شهورك سعادة مش شهر فبراير بس
تحياتى

حزيــــــــــــــــــن said...

كل عام وانت طيبه
انا كنت فاكرك كبيره عن كده بكتير
طلعتى لسه 21 عام
انا لو مكانك مكنتش قولت سنى
اتمنالك حياه سعيده وقريبه من الله

همسات دافئه said...

سكر
صديقى الجديد المعجب باسمى :)))
وانت طيب يارب وربنا يخلى ايامك الى جايه كمان كلها سعيده:)

*******
بيقولوا سايكو
أيات حبيبت قلبى من جووووووه
ربنا يخليكى ليا ويديم صداقتنا
بالنسبه للكاس :(مشعرفه أقول ايه على الموقف الى ذكرتيه واحد زميلى برضه كانت عينه هتروح لأن واحد من الى ماسكين النار كان هيفتحها فى وشه

وعيد الحب
انا لسه مش مقتنعه انه لازم يكون فى مناسبه ممكن تعبر عن مشاعرك من غير مناسبه

وعيد ميلادى
وانتى طيبه ويارب دايما وسلميلى على امنيه والفيس بوك :):)

عيد بلوجى
دا ابنك انتى كمان وانتى طيبه وعقبال ما يكبر قدامك كده معايا
مرسى ياأحلى صحبه فى الدنيا:)

همسات دافئه said...

ألاء
ربنا يخليكى على ذوقك وكلامك اللطيف:)
عيد الحب
انا طلعت أجدع منك وروحت جايبه ورد لصحباتى وفرحنا مع بعض واتصورنا وقضنها حلو جدا اتصرفى يا لولا بدل الحقد هههه
وانتى طيبه ربنا يخليكى وأول زياره ليا أكيد عيد لوحدها تحياتى ياقمر وتتكرر زياراتك ان شاء الله:):)

**************8
قلب ينبض لله
نورتينى بجد ياأحلى قلب:)
وانتى طيبه أسعدنى مرورك جدا
:)

همسات دافئه said...

دوحه
وانت طيب ربنا يخليك أسعدنى وجودك معايا فى شهرى المفضل:):)

***********
حزين
وانت طيب
مقولش سنى ليه يعنى انتم اخواتى وكنت فاكرنى أكبر الهى يجبر بخاطرك أول مره حد ميقوليش انى صغيره
:)
أسعدتنى يا حزين ربنا يخليك لبلوجى انت صديق قديم وعزيز عليا أوى:)

صالح سعيد said...

بصراحه انا شايف ان فرحة الناس يوم فوزنا بكاس الامم كان اكبر من فرحتهم باليوم العالمى للدباديب
قصدى الفلانتاين
الناس كانت جعانه فرحه بجد
اول زياره لمدونتك ولن تكون الاخيره
تقبلى تحياتى

3abdo me7tas said...

والله انا اول ما شوفت البوست بتاعك قلت انا عكسك خالص
انا شهر اتنين مش بحبه خاااااااااااااالص
الشهر ده بالذات كل حاجه وحشه حصلتى كانت فى الشهر ده
بس طالما عيد ميلادك فى شهر اتنين فبقول كل سنه وانتى طيبة يا ستى

همسات دافئه said...

الناس كلها جعانه فرحه
:(
لما فكرت فى جملتك ده يمكن عرفت السبب وجاوبتلى على اسباب دهشتى من الى شفته
أسعدنى مرورك وأول زياره
وانا كمان ارجو انها متكنش الأخيره:)

************
محتاس باشا
ياساتر يارب كل الحاجات الوحشه بتحصل فى فبراير الله يسامحك
بس أهو سبب سعيد أهو يمكن تغير رأيك ده شويه:)
وانت طيب يامحمد وان شاء الله مش هيحصل حاجه وحشه تانى:)

الراقـــص مع الذئـــــاب said...

السلام عليكم

كل سنة وانتي طيبة والبلوج بخير


بس بلاش عيد الحب
عشان هو مش بدعة ولا حاجة

هو عيد ميلاد قسيس
يعني مصيبة سودا

دمتي في خير اختي الكريمة

همسات دافئه said...

الراقص مع الذئاب
ههههه
مصيبه وسوده ربنا يبعدنا عن المصايب ان شاء الله
وانت طيب يامحمد وبلوجى أهو بقى عنده سنه وكبر على ايدك ما انت مربيه معايا:)
تسلملى يامحمد يارب ودايما تسعدنى بتعليقاتك كده:)