Friday, March 26, 2010

أيوة بخاف

أيوة بخاف
ومتلمنيش.
. عارفة ليه الموجة لما البحر بيرميها بالقسوة ده, وينزعها من جواه
ويخبطها في صخرة قوية فتنزف ملحها الأبيص
وميتبقاش منها غير شوية طرطشة فارغة
بترجع تترمي في حضنة من تاني.
. عشان بتخاف
***
عارفة ليه الصدفة المشرشرة المركونة على عتبة البحر
مبتسبش نفسها لنشوة الغرق في جنون البحر الطايش
وبتغرس نفسها فى الرمل
. .
عشان بتخاف
***
عارفة المطر
حتى المطر تجسيد لخوف الميه اللي قدرت فى يوم تعلى وتكون سحاب
رغم اننا بنطرد في معادها العصافير ونلم الأطفال وحبات الفاكهة
ونسيب راسها تخبط في الشوارع والأرصفة وعواميد النور
من غير ما ندفي قطرتها المرتعشة بايدينا الباردة
. .
بتنزل عشان بتخاف تتخنق جوة السحاب
***
فاكسري لو تقدري حدود الخوف وإلعنيه
خلي الكواكب تثور على المدار وتعصاه
طمني الوليد وامنعي صراخة لحظة خروجة للحياة
فهمي العقارب لما ألمسها فى يوم بحنان ... متقتلنيش
يمكن سعتها تقدري تقطعي شرايين اليأس جوايه
أو تنزعي نبرة الألم من غنايا
أيوة حبيت في يوم ومابحتش ولا خبيت
أيوة اتألمت في يوم ومصرختش ولا بكيت
أيوة بخاف
ومتلمنيش
لومي الكون
عشان علمني
. . أخاف .
شيماء

10 comments:

Wish I were a Butterfly ... said...

وحشتني رقة مدونتك دي اوي يا شيماء

أول مرة أفكر في المطر بالطريقة دي!! دايما ليكي نظرة وكلمات غير كل الناس

دمت جميلة... ومبدعة يا شيمو

خدي بالك من نفسك بجد

MKSARAT - SAYED SAAD said...

الخوف موجود وهيفضل موجود فينا مش هنقدر نتخلص منه ولا نهرب منه انتى عارف فكرتيني ببوست كنت كتبته من فترة عن الخوف عن وجوده فيحياتنا وهل هو غريزة ولا شئ مكتسب لو تحبي تقريه هتلقيه عندي بمعنوام (الخوف)
بس معاكي حق في وصفك للخوف ، كلماتك نفسها حسيت انها مليان خوف بجد
كوني بخير

همسات دافئه said...

butterfly
يااااااااااااه
انتي اللى وحشتيني اوييييي
لاء تعالي خدي بالك مني انتي
عايزة اشوفك بجد:)

**********

سيد
عشان أنا فعلا مليانه خوف
شكرا ياسيد
تعليقك بيضفليكتير:)

سمكه واحده said...

الله علي احساسك يشيمو
في الخوف
في الغيره
في الحزن
في الفرحه
في الامان
في السعاده
في البسمه
في الدمعه
بجد
ربنا يحرسك
ربنا يسعد قلبك ويعد عنك كل خوف ويبعد عنك كل حاجه وحشه
برغم البوست حزين وحساها اوي وحاسه الخوف فيه بس بكلماتك بتخلي كل حاجه مطفيه منوره وبتخلي كل حاجه بعيده قريبه بتخلي كل حاجه حزينه سعيده برغم كلمات حزينه بس غصب عني بشوفها بعين تانيه بنظره تانيه بشكل مختلف
عشان كده بقلك وانا واثقه ومتأكده
وطبعا كلامي مش هيضيف جديد لانك كده فعلا انك مبدعه ومفيش منك كتير
ولا مبالغه ولا مجامله
والله وربنا عالم
تعرفي بحب اجي هنا عشان احس بحجات انتي لوحدك تعرفي تعبري عنها وتخليها تنطق وتتجسد ادامي
دمتي مبدعه متألقه
ربنا يبعد عنك كل حاجه وحشه
بتوحشيني
ياللي مفيش منك كتير
(:

3abdo me7tas said...

يااااااااااااااااه
من زمان مدخلتش عندك يا شيماء
مكنتش عارف انى بحرم نفسي من الكلام الجميل ده
بجد احساسك جميل اوى
وتشبهاتك فوق الروعه
كملى يا شيماء بجد باستمتع بالكلام الجميل ده

saragebaly said...

جميل اوي اوي تعبيرك ووصفك للموجة

حسيته جدا

رقيقة كتاباتك وتخيلاتك جدا


دام قلبك وقلمك بألف خير

سارة

قلوب بتغنى said...

هاى يا شوشو
على فكرة انا مان شيماء
تدوينه رقيقه وكلمات عذبه يعبر عن تاملات صاحبته تحياتى

همسات دافئه said...

سمكة
انا مش عارفة أقولك ايه
الكلام ده أكبر مني بكتير أوي
ربنا يخليكي ليا

محمد

يااااااااااااه
فينك من زماااان
ربنا يكرمك
انت اللى كنت حرمني من تعليقاتك
رجعت ولا لسه واتجوزت ولاايه؟

سارة

ودام تشجيعك وتعليقك ربنا يخليكي

شيماء
نورتيني ياشيمو ربنا يخليكي
ابقى تعالي على طول

momken said...

دائما كمان تعودناكى

منتهى الرقه والنعومه

وصادقه حتى فى صمتك

دمتى بغايه الابداع

تحياتى

سمكه واحده said...

انا جيت اطمن واسال عليكي
هو
هو
يعني
ايه
لسه خايفه
!!!!
اخبارك ايه
اتمني تكوني بالف خير
ومش هقول فينك لما نوحشك ياستي ابقي اكتبي اي حاجه

تحياتي