كلنا مدخنين

الفلبينيات

أتحدى ان الى جاه فى دماغ اى واحد قرا الكلمه ده انه قال انى هتكلم عن الشغالات.معزورين...دا حتى الست دلوقتى لما تتخانق مع جوزها تقله انت كنت فاكرنى الفلبنيه الى جبتهالك الست والدتك وصلت لدرجه ان الفلبين احتجت على دوله عشان كتبت فى القاااموس بتاعها ان شغالات معناها فلبنيات حكمتوا على شعب كاااااااامل عشان فئه قليله جدا

ما المصريين بيروحوا يشتغلوا فى اوروبا وامريكا وياعينى الناس الى غرقت وهى رايحه ايطاليا ده كانت هتروح تشتغل ايه وزرا ولا سفرا ما بيشتغلوا كناسين وزبالين وشحاتين يبقى كده خلاص اى حد يشوفهم هناك يبقى المصريين كلهم زبالين وشحاتين

******

عندنا بقى بنت كده تتجرأ وتقول لأهلها وهى بتاعت ستاشر سبعتاشر سنه انها عايزه تشتغل تلاقى الرد الحتوم ليه هو احنا مش قادرين نصرف عليكى تقلهم لاء قادرين بس انا عايزه اعتمد على نفسى وكل البنات الى فى الدول الى بتفهم بيشتغلوا فى اى مطعم او كافى وهم بيدرسوا ...بس وهنا تبقى الطامه الكبرى وتسمع الصرخه المتينه والعيون الى تتفتح متر كماااااااان عايزه تشتغلى فى مطعم الناس تقول ايه وواحد بقى تعجبيه يقوم.....وتديهملها بالكلام المحفوظ من ايام اجدادنا ده ولو البنت عملت ايه محدش هيغيرلهم فكرهم الى للأسف شربهولنا وبقى مننا كتير شايفين ان البنت الى بتشتغل جرسونه او فى السياحه او رافضه الجواز انها بنت مش كويسه

******

اهلك عندهم خبره اكتر ويفهموا عنك -انا أبوك أو امك ولازم تسمع الكلام لأنى ادرى بمصلحتك

من الآخر بقى فكره ان انت بابا تبقى عارف كل حاجه ده انتهت لأن دلوقتى وكلنا بنشوفها فى بيوتنا ان الأولاد بيعرفوا أكتر من أهاليهم والأهل لما بيتزنقوا فى حاجه فى الموبايل ولا الكمبيوتر بيلجأوا لولادهم الأهل على عينى وعلى راسى عندهم خبره فى الحياه أكتر وحقهم علينا اننا نبرهم لكن مش من حقهم يختارولنا الطريق الى نمشى فيه ولا يشغلونا الشغلانه الى تناسبنا من وجهه نظرهم ولا يدخلونا الكليه الى هم شايفنها صح لأن مش الى هم شايفينه دايما بيكون صح

********

خلايا الجسم بتتغير والفصول بتتغير المخ سرعته اكتر من سرعه الضوء وبيخزن 2مليون معلومه فى الثانيه بذمتكم عملته ايه بالقوه ده غير انكم ملتوها افكار عقيمه

الى بيدخن مثلا مش عارف اد ايه دا غلط وحرام مش عارف انه لو عمل اشعه على رئته هيلاقيها سوده من النكوتين مش عارف ان زائد كل الذنوب الى بياخدها على ايذاء نفسه بياخد ضعفها على ايذاء غيره مش عارف ان كل نبته خصراء بتشتكيه لربنا وبتدعى عليه لأنه بيديها هوا ملوث ومع ذلك برضه بيشرب وواحد مره قالى مسمعناش كلام اهالينا واحنا صغيرين هنسمع كلام التلفزيون أهو ده عمره ما هيبطل لآنه مبيسمعش غير كلام نفسه وبس اشرب سجاير ذى ما انت عايز بس مره كده اصحى الصبح وافتح شباكك وخد شقييييق وخلى الهوا فى جسمك شويه وبعدين خرجه هتحس باحساس تحفه انزل الشارع قبل ما تولع فى نفسك او تولع سجارتك وامشى خمس دقايق بس فى هوا نظيف وبعدين اعد جنب واحد بيدخن وشم رحته ورحتك يوم ما تفتح المجال لرئتك انها تشم هوا نظيف وقتها بس هتعرف تقارن بين الكويس والوحش ووالله هتعرف تختار صح كلنا بندمر مخنا وحياتنا بسجاره الأفكار السلبيه ذى ما المدخن بيدمر جسمه بسجاره النكوتين

كلنا مدخنيــــــــــــــــــــــــــــــــــــــــــــــــــــــــــــــن

وذى ما المدخن يفتح المجال لرئته افتح انت المجال لمخك انه يستقبل افكار غير الى علموهالنا

روح الفلبين وانت هتفاجأ ان مش كلهم شغالين فيهم دكاتره ومهندسين وطلبه ذينا بالظبط والمصريين مش شحاتين اليابانيه مش الست الى بتترمى تحت رجل جوزها عشان تحييه اتعامل مع الجرسونات والمرشدات والبنات الى رفضه الجواز والمطلقات واتحداك لو لقتهم كلهم بنات وحشه

كان فى مدون(اسامه, كلام لوجيك) كاتب جمله رائعه

لا تمشى على الخط المرسوم سابقا لأنه سيقودك الى ما وصل اليه الآخرون

غير الخط ,غير الأفكار الى جابت الناس لورا يمكن لعل وعسى تعمل الى هم فشلوا فيه