Wednesday, April 15, 2009

لما قابلتك

لما قابلتك حطيت ايدي على ضلوعي اسندها ليكسرها قلبي الهايج ويطير يوزع فرحته على الورد الحزين الى محدش بيشتريه وحبات الفراولة المخنوقة في قفص ضيق وشلة البنات الى زهقوا من لعبه المنديل ويمكن يرقص رقصة سلو مع دخان مشروبك المفضل على أغنية عمرو دياب الجديدة ويخلي السجاير بنكهة المانجا والشيكولاتة ويدهن كريم مزيل للتجاعيد نهائيا على وش كل ست قدام مرايتها حيرانة ويربط رباط الجزم المفكوكة ويحل مسألة الرياضيات الصعبة ويملا الكشاكيل بالنجوم والدرجات النهائية ويلف بشريطة بمبي ديل حصان على شعر كل بنوتة شقية ويملا الدنيا بألوان الطيف وطيارات الورق والبالونات الملونة مش بعيد كمان يفتن عليا لخطوط الشارع البيضا الى محدش بيعدي عليها ولبياع العصير الى دايما بيعاكسني وممكن يتحدى عمود النور ويثبتلة ان نور فرحتة هينور 3 محافظات زياده فتخلص شحنة الفرح الى معاة ويرجع يزود حيرتي بسؤالة هشوفيه امتى تأني!! **** ولما مشيت كان نفسى أوقف همهمات الأشجار وأسكت غنا العصافير وأكتم ضحكة الأطفال كان نفسي أبوظ كلاكسات العربيات وصفارة الشرطي ورنات الموبايلات. .متصدقش اني شريره انا بس كنت عايزة احافظ على صوتك جوه وداني لأطول وقت ممكن **** لما سبتك ضميت ايدي بشدة خفت لتتبخر مني روعة لمستك وتخلي اسدين قصر النيل –بعد العمر ده كله-يتصالحوا ويمسكوا بشوق ايد بعض. ياترى لسه هطول غيابك ولسة هتباعد معاد لقانا لسه ناوي تحرم الكون من كل الفرحة ده؟

25 comments:

كفايـة طيبـة said...

ايه التعبيرات الرائعة دي يابنت
ماشاء الله :)

انا متخيلة البوست ده باللغة العربية هيبقي يجنن بجد اكتر ماهو يجنن دلوقتى :)

موناليزا said...

ايه المشاعر الجميلة دى
ربى يفرحك قريب

نبض اسكندرية said...

وحشتنىىىىىىىىىىىىىىىى موت بجد

ووحشنى بوستاتك المجنونة دى

روعة ولسة روعة زى ماانتى والله بجد على احساسك

يارب دايما فرح فى حياتك ياحلى همسة

ويارب ميبقاش فى بعاد ولا فراق ابدا

دمتى بخير ياقمر
تحياتى

Hossam said...

Ohh
بجد انا بتنهد من الكلامالصور كمان حلوة اوى خلت الواحد يعيش لحظات فعلا جميلة.
تحياتى لك عل الموضوع اللى مليان تشبيهات واستعرات مكنية مش طبيعية
شكرا
سلام

سمكه واحده said...

اول مره مفهمش اوي حاجه كتباها
يمكن عشان مش مركزه
او انا علي ادي معلش هحاول اقرها تاني وافهمها
بس بغض النظر عن قله معرفتي وادراكي طبعا
انا بحب وبنبهر بكل حاجه بتكتبيها
اكيد هرجعلك تاني
انت تحفه اصلا ماشاء الله عليكي
بس راعي الناس الي علي قدهم اللي زي حلاتي الله يكرمك
عموما ربنا يسعدك ويفرحك
تحياتي ياقمر

MONDAHESH said...

يا حظ يا حظ

أنا مش بحسد .. ده مجرد حقد

:))

دايما التعبير عن الحالة عندك متميز لدرجة انه بيدخل القارئ في حالة صعب انه يوصفها


تحياتي

سمكه واحده said...

هههههههههههههه
ايوه انا كده فهمت
ده انا(وش مكسوف)
يمكن المره اي فاتت مكنتش مركزه
عموما ياستي ربنا يسعدك ويجعل ايامك كلها فرحه وامل
وديما مشاعر فرح وسعاده
اسلوبك وتعبيرك ووصفك جميل وتحسي انه صادق اوي دي بتبقي مشاعر حقيقيه وحساس عالي ربنا يديمه عليكي
اللي اداك يديني ياسيدي
الله يسهله
تحياتي
يا ارق همسه

أحمد بكر said...

لا طبعا ملوش حق يحرم الكون من الفرحة دى كلها
بس بلاش تبوظى كلكسات العربيات
دمتى بالف خير

إبـراهيم ... said...

ممكن أقول تاني هنـــا إنها تحفة، وعاجباني قوووووي


بس مالكيش حق تكتبيها ورا بعضها كده :)

ربنا يتم فرحك

momken said...

غلطان غلطان والغلط ركبه من راسه لراسه برضو

ازاى يوقف الكرنفال ده كله

لكن والله عاوز اشكره انه تصرفه استفوك علشان نسمع منك الكلام الرائع ده

والمشاعر الدافيه دى

دايما كتبتك بتعجبنى من زمان اوى

من واحنا صغيرين

تسلم ايدك



تحياتى

The Manager said...

لا لا الكلام دة بجد مش عادي
دا خدني في علم تاني اصلا وانا بقرأه

فعلا الإحساس دة حقيقي بيملى الدنيا
وميتوصفش
بس انتى وصفتيه على اقرب شكل ليه وبجد ابدعتى قوي

لما سبتك ضميت ايدي بشدة خفت لتتبخر مني روعة لمستك ...
والله مش بجامل
ولا بضحك عليكي بكلمتين علشان تصالحيني
والله احساسك في البوست دة واصل لناس كتير قوي وقلوب كتير قوي

انا مش عايزك تكوني زعلانة مني
وبعتذرلك قدام الناس اهه
انا والله مليش ذنب في إللى حصل

واحنا علطول اخوات
اتمني نفضل كدة يااااارب

حماده زيدان said...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com

أرجوا إرسال مواضيعكم لأختيار الأفضل لنشره العدد القادم
http://www.facebook.com/inbox/readmessage.php?t=1069922064069&f=1&e=-12#/group.php?gid=78080770039

Reply to Your PostDelete Post

hasona said...
This comment has been removed by the author.
Anonymous said...

ازيك يا شيمو
بقى اسدين قصر النيل هيتصالحوا
اممممممممم ماشى يا ستى يا بخته يا ستى ولو مش موجود يبقى يا بخته لما يجى برضه

Unknown said...

(وحبات الفراولة المخنوقة في قفص ضيق وشلة البنات الى زهقوا من لعبه المنديل )

جديدة و جميلة و تعبيرات احسها من الواقع

أحمد بكر said...
This comment has been removed by the author.
أحمد بكر said...

أزيك أيه الأخبار فينك يابنتى أدعيلى أمتحانات الماجيستير ع الأبواب مستنى تعليقاتك الرقيقه من تانى على مدونتى المتواضعه والسلام عليكم

Anonymous said...

انتى فييييييييييييين؟
يا رب تكونى بخير

همسات دافئه said...

كفايه طيبة
ربنا يخليكي يتمشجاني دايما:)
هو انا طبعابحب الفصحى أكتر بس هي جت كده بقى:):)



**************

موناليزا
ياارب أيتها الرقيقة:)
أسعدني وجودك:)

همسات دافئه said...

نبض اسكندرية

وانتي كمان ربنا يخليكي يارب
والله هي وحشتني انا كمان:)
بحب تعليقاتك اوييييييي:)

*********

حســــــام
بجد انا الى شكرا
على تعليقك وزيارتك الجميلة ده
أسعدني وجودك حقاً:):)

همسات دافئه said...

سمكة


هههه
ياحبيبتي خدي وقتك ده سهلة خالص ومبسوطة انك حاولتي تاني وانا بحب تفاعلك معايا جدااااااا


************

مندهش


الله أكبر الله أكبر
هو ده باين التعليق الخامس والنهارده الخميس وكده
هههههههه
شكرا ياعلى ربنا يكرمك:):)

همسات دافئه said...

بيكر

خايف اوي على الكلاكسات يعني
ومش مهم صوته الى هيروح من وداني
لاء هبوظها شكلك من الناس الى مشبتبطل كلكسه وهي ماشية
مزعج :P
ميرسى يابيكر نورت البوست بتعليقك:)

*************

ابراهيم:)

صديقى الجديد الغالي
وأكتر مشجعين ليا
البلوج كله تحت امرك شخبط فيه ذى ما تحب
معرفتش احطها ورا بعض:(
نورت المدونه يافندم:)

همسات دافئه said...

ممكن

هههههههههه
غلطان غلطان طبعا يعني:)
ممكن بجد انت الى تعليقك بيعجبني اوي وببقى مستنياه بجد
تسلملي:))

**********

Manger

أي خدمة ياباشا شوف العالم الى تحب ترحلة وانا اوديك ليه على طول
وخلاص بقى الموضوع مش مستاهل حصل خير:)
ميرسى لوجودك

همسات دافئه said...

رحلة البحث

لما يبقى ييجي:)
والنهارده (الخميس) بقى وكده
وان الأسدين اتصالحوا (خمس )مرات قبل كده وبتاع
ههههههه
نورتني والله:)

************

عاليا

شكرا اوييييي
واحشني تعليقك:)

همسات دافئه said...

بيكر

ربنا يوفقك يااااااااااارب وتجيب امتياز كبييييير كده
ميرسى على سؤالك انا عارفة اني اعتزلت شوية بس بجد وجودك بيؤنسني وبيخليني مصره اكتب تاني واكمل
جايالك شور:)

**************

رحلة البحث

انا هنا اهوووووووو
انت بالذات بجد قصرت معاك آخر حاجة
ربنا يكرمك بسؤالك عليا ويديمة يارب
أسعدني وجودك بجد ويمكن هو الى خلاني ارد على كل الناس وبجهز بوست دلوقتي حالاً:)