علمونى الخوف

تقريبا كل التعليقات الى فى البوست الى فات بتقول اننا المفروض نتحدى الخوف ونخليه يدفعنا للأمام مش يرجعنا خطوات حتى محمود(رئيس جمهريه نفسى)قال جمله جميله اوى -الخوف خلق لنستشعر لذه التغلب عليها_طيب انا معكم وموافقه بس نعمل ايه بقى فى الى علمونا اننا نخاف

أيوه انا عن نفسى اتعلمت انى أخاف من كل حاجه ومن كل الناس الى أعرفهم قبل الى معرفهمش

علمونى انى مكلمش حد معرفوش لإنه حتما هيئذينى رغم انى كنت بحب اتكلم مع كل الناس من غير أى حساب وفى موقف صغير كده من اسبوع بالظبط كنت راكبه فى المواصلات جنب ست وطلعت علبه لبان تشكلتس وخدت منه وبعدين عزمت عليا ابتسمتلها وقلتلها مرسى مش عايزه بس هى أصرت ,خدها ومثلت انى كلتها وحطها فى الشنطه وقعدت أحرك فى بقى لحد ما صدعت أصلى خفت أكلها البنت ده هى الى من سنتين بالظبط كان يوم مطره ومفيش حاجه كانت راضيه توصلنى وبعد فتره عربيه ملاكى فيها ست وبنتها وقفتلى بحسن نيه ومن غير ما أحسب حاجه ركبت والست كانت طيبه جدا ووصلتنى لحد البيت بس قبل ما انزل رمتلى جمله قالتلى انا لو بنتى عملت الحركه الى انتى عملتيها ده كنت بهدلتها لما حكيت الموقف ده لصحابى بهدلونى وقالوا عليه مجنونه وان الست كان ممكن تعمل وتعمل وتعمل

أيوه انا علمونى انى أخاف من الناس رغم انى عمرى ما كنت بخاف

وعلمونى أخاف من صحابى قالولى احذر عدوك مره واحذر صديقك ألف مره لربما انقلب الصديق عدوا

علمونى اخاف أركب مواصلات لإنهم بيتحرشوا بالبنات هناك

علمونى أخاف أكلم ولاد أو اسمح لحد يقولى بحبك لإنهم كلهم كدابين وبيضحكوا على البنات وأخرت انى ادى مشاعرى لحد ده حاجتين ياما هيرمينى ويكسر قلبى بعد ما يزهق منى يااما ورقه عرفى مالهاش اى احتمال تالت

علمونى أخاف اقرا عن الجنس لإنى هبقى بنت مش كويسه ولما سألت ماما جابت ورقه ورسمتلى كل حاجه وشرحتلى وأول ما خلصت راحت مسحاها بالأستيكه ورميه الورقه وقالتلى لو عايزه تعرفى حاجه اسألينى انا اوعى تعرفى من حد غيرى فخفت اتفرج على فلم أو اقرا أى كتاب

علمونى أخاف من دكتورى فى الجامعه ومفتحش بقى قدامه رغم ان كان لسانى طويل وانا فى ثانوى وعمرى ما سمحت لمدرس انه يقول كلام انا مش مقتنعه بيه او يفرض عليا رأى بس فى الجامعه لاء خوفونى لإنه ممكن يضيعلى سنه من عمرى

علمونى أخاف امشى فى الشارع لوحدى وقلعت خاتمى الدهب, خفت من كل الناس الى ماشين فى الشارع ليسرقونى اويئذونى لدرجه انى أكتر من مره واحد قالى متخافيش كده والله العظيم ما هعكسك

قبل ما أعمل اى حاجه كانوا بيقولوا خلى بالك والكلمه ده المعنى الى وراها خافى عشان تسلمى يارتهم كانوا أجبرونى معملش كل الحاجات الى ذكرتها ده كنت أكيد هعملها من وراهم لكن لما اخاف اصلا يبقى كده ضمنوا انى عمرى ما هعملها

الخوف اتزرع فينا احنا أصلا متولداش وهو جوانا ولا احنا الى صنعناه

لسه سؤالى ملقتلوش اجابه ايه الى ممكن ينزع الخوف ده من جوايا؟ هل انا كنت زمان صح ولا كده؟ صح رغم كرهى للخوف الا انى اول المعترفين انا بخاف